Alaıaq ózin polıtsııa departamenti bastyǵynyń orynbasarymyn dep tanystyrǵan – jańa tásil
M. Jumabaev aýdanynyń turǵynyna jeli alaıaǵy qońyraý shalyp, ózin SQO PD bastyǵynyń orynbasary Rýslan Nazarovpyn dep tanystyrǵan. Er adam onyń aıtqanyna senbeı, áńgimeni jazyp alyp, bolǵan jaǵdaı týraly polıtsııaǵa habarlaǵan.
«Osyndaı jaǵdaılar jıi kezdesedi. Alaıaqtar adamǵa psıhologııalyq qysym kórsetýge tyrysady, oılanýǵa múmkindik bermeı asyqtyrady. Krımınaldyq polıtsııa qyzmetkerleri telefonmen mundaı sóılesýge barmaıtynyn este saqtaǵan jón. Olar kýáger nemese kúdikti retinde adamnan jaýap alady, bul áreket tek aldyn ala habarlama jiberilip, jeke kezdesý kezinde júzege asady. Kúmándi qońyraý tússe, «102» arnasyna habarlańyz. Polıtseıdiń atyn jamylyp, ózin tanystyrǵan alaıaq boıynsha qyzmetkerdiń jeke qabyldaýyna jazylýǵa bolady. Sonymen qatar, eger alaıaq ózin bank qyzmetkerimin dep habarlassa, banktiń resmı telefonyna qońyraý shalyp, qońyraý shalý faktisin tekserińiz. Óz qoryńyzdyń saqtalýyna kóz jetkizý úshin bankke jeke júginińiz», - deıdi SQO PD bastyǵynyń orynbasary Rýslan Nazarov.
Belgili bolǵanyndaı, Soltústik Qazaqstan oblysynda ınternettegi alaıaqtar jańa tásildi belsendi qoldana bastaǵan. «Bankten qońyraý shalý týraly» burynǵy ádisterin qoldanar aldynda, ózderin polıtsııa nemese prokýratýra qyzmetkerimiz dep tanystyrady. Sonymen qatar, olar qyzmettegi laýazym ıeleriniń atyn jamylyp, qońyraý soǵady. Banktiń josyqsyz qyzmetkerlerine qatysty tergeý júrgizilip jatyr dep, qurbandaryn aldaıdy. Іri kólemde nesıe resimdeýge tyrysyp jatqandaryn aıtyp, bul jaǵdaıdan saqtaný úshin «nusqaýlar» berip, aqshany qylmyskerler usynǵan shotqa aýdarýǵa májbúrleıdi. Mundaı tásilge aldanǵan adamdar mıllıondap shyǵynǵa batady.
Bıylǵy 7 aıda SQO-da 464 ınternettegi alaıaqtyq tirkelgen, onyń 129-y «bankten qońyraý shalý» shemasy boıynsha.
Foto: polisia.kz
