«Alaıaq kásiporyndar senimnen aıyryldy» - baspasózge sholý
***
«Egemen Qazaqstan» gazetiniń jazýynsha, Semeı qalasynyń turǵyny Dinıslam Ábdiqojaulynyń qolynda qundy jádiger bar. Aqsaqal osy ýaqytqa deıin Abaıdyń bákisin saqtap kelgen. Jetpistiń tórteýine kelgen qarııa bákiniń atalarynan muraǵa qalǵanyn aıtady. 1890 jyldary Abaı elinde qatty jut bolyp, úıir jylqyny aman alyp qalý úshin aqyn aýyly Ertistiń oń jaǵalaýyndaǵy Izatolla aýylyna qystap shyqqan eken. Meıramǵalı nyspyly baıdyń qystaýyna jylqysyn panalatqan Abaı óziniń bákisin baıdyń balasyna syıǵa tartqan kórinedi. Sol ýaqyttan beri atadan balaǵa muraǵa qalyp kele jatqan qundy jádigerdi Dinıslam aqsaqal 56 jasynda anasynan syıǵa alypty. Qarııa bákini buǵan deıin elimizdiń Mádenıet mınıstrligi men Almatydaǵy Ábilhan Qasteev atyndaǵy óner murajaıyna aparyp, kórsetip qaıtqan eken. Dinıslam Ábdiqojauly uzaq jyl qasterlep saqtaǵan buıymdy satyp alýshylar bolsa, berýge daıyn ekenin jetkizdi. - 2009 jyly Mádenıet mınıstrligine barǵanymda, ondaǵy jaýapty qyzmetkerler: «Ata, bul bákini shetke shyǵarmańyz. Eger shetelge shyǵyp ketse, onyń qaıtarymyna óte kóp qun suraýy múmkin», dedi. Sodan beri bákini ózimde saqtap kelemin. Áıtpese, Qytaı elinen satyp alýǵa nıet bildirgender, aýktsıonǵa shyǵarýǵa qolqalaǵandar boldy. Olardyń eshqaısysyna qulaq asqan joqpyn, - deıdi qarııa. Sary jez tústi saby bar, qyzyldy-jasyldy laǵyl tastarmen kómkerilgen, musylmansha aı men juldyzdyń beınesi bederlengen, asyl júzi sol kúıi saqtalǵan súp-súıkimdi bákiden Abaı atamyzdyń talǵamyn tarazylaýǵa bolady. Bul materıal «Aqyn ata bákisi» degen taqyryppen berilgen.
Bas basylymda «Jarty álemdi sharlaǵan» degen maqala basyldy. Velosıpedpen jarty álemdi sharlap ótýge bel býǵan serb saıahatshysy Pavlodarǵa jetti. Ol bul saparyn 12 sáýirde Serbııa astanasy - Belgrad qalasynan bastaǵan bolatyn. Sodan beri 5 myń shaqyrym joldy artta qaldyrǵan Dragan Shıbalıch Rýmynııa, Ýkraına, Belarýs jáne Reseı elderin basyp ótken. Osylaısha velosaıahatshy Japonııa astanasy - Tokıoǵa deıin jetýdi kózdeıdi. Al ol úshin Shıbalıch taǵy 15 myń shaqyrym joldy artta qaldyrýy tıis. Serbııa azamaty bul saparyn alty aıda aıaqtap, álem rekordyn jańǵyrtýdy maqsat tutyp otyr. Pavlodardan bólek ol elimizdiń Aqtóbe, Qostanaı jáne Astana qalalaryna atbasyn tiredi. Ári qaraı, saıahatshy Reseıdiń Novosibir qalasy jáne Mońǵolııa, Ońtústik Koreıa elderi arqyly dittegen jerine jetýdi josparlap otyr. Alys baǵytty betke alǵan 37 jastaǵy serbııalyq ózimen birge túnde túneıtin shatyr, noýtbýk jáne sý quıatyn quty ǵana alyp shyqqan. Ol kúnine 150 shaqyrymǵa deıin jol júredi.
***
« Qazaqstan atomǵa qatysty ulttyq zańnamasyn jańartýǵa kiristi. Qoldanystaǵysy osydan 15 jyl buryn qabyldanǵan eken. Osyǵan oraı Parlamentke «Atom energııasyn paıdalaný týraly» jáne «Keıbir zańnamalyq aktilerge atom energııasyn paıdalaný máseleleri boıynsha ózgerister men tolyqtyrýlar engizý týraly» zańdarynyń jobalary engizildi. Ótken aptada Májilis bul qujattardy birinshi o qylymda tujyrymdamalyq túrde maquldaǵan. Endi ekinshi oqylymǵa ázirleý aıasynda talqylaýlar bastaldy», - dep jazady «Aıqyn» gazeti búgingi sanyndaǵy «Atom, qaıda barasyń?» atty maqalasynda.
ıAdrolyq synaqtardan júregi ábden shaılyǵyp qalǵan halqymyz atom dese atoı salýǵa ázir turady. Sondyqtan Úkimettiń tapsyrmasymen Energetıka mınıstri Vladımır Shkolnıktiń ózi qalaýlylar arasynda túsindirme jumystaryn júrgizýde.
Osy gazette «Alaıaq kásiporyndar senimnen aıyryldy» degen maqala basyldy. Bıylǵy jyldyń basynda nurotandyq depýtattar, qazaqstandyq óndirýshilerdiń muń-zaryn tyńdaı kele, «sáıkestilik sertıfıkattaryn» berý jumysyn qatań synǵa alǵan bolatyn. Óıtkeni shetelden, kórshi Qytaıdan taýar tasıtyn alypsatarlardyń qolyna osy qundy qujattardyń túsip ketýi kesirinen tenderlerde otandyq taýar óndirýshiler jeńilis taýyp, shyǵynǵa batýda. Bul «qazaqstandyq mazmun» saıasatyn iske asyrýǵa da kesirin tıgizgen. Sondyqtan Májilis vıtse-spıkeri, «Nur Otan» partııasy fraktsııasynyń jetekshisi Darıǵa Nazarbaeva jaýapty qurylymdarǵa shara qabyldaýdy tapsyrǵan. Keshe «Atameken» palatasy «ST-KZ» sertıfıkaty bar kompanııalarǵa jappaı aýdıt júrgizetinin jarııalady. «Revızııa» barysynda olardyń atalǵan sertıfıkatty qalaı alǵandyǵy jáne ony ıelenýge laıyqty-laıyqsyzdyǵy tekseriledi.
***
«Ekspress-K» basylymynyń búgingi sanynda « Flamıngo ýbıvaıýt... ımpotenty » degen materıal jarııalandy. Qazaqstanda Qorǵaljyn qoryǵynda uıa basyp júrgen alqyzyl qoqıqazdardy joǵaltyp alý qaýpi bar. Sebebi, brakonerler qoqıqazdardyń jemine aınalǵan Artemia salina shaıandarynyń jumyrtqalaryn kóptep jınaı bastaǵan kórinedi.
Atap aıtqanda, Teńiz kóli tuzdy bolǵandyqtan, onda osy alqyzyl shaıandar mekendeıdi. Bul shaıandardy azyq etkendikten, qoqıqazdar alqyzyl túske tabıǵı túrde boıanady. Qytaılyq medıtsınada atalǵan shaıandardyń jumyrtqalary potentsııany kóteretin dárini daıarlaýǵa paıdalanylady eken. Qytaıǵa osy kontrabandalyq taýardy tasymaldaıtyndar bul jumyrtqalardyń kelisine 100 dollar berip júr.
