Alaıaq Atyraý oblysynda ákim atynan habarlama taratqan
Málim bolǵandaı, alaıaq WhatsApp messendjerindegi nomeriniń profıline Jylyoı aýdanynyń ákimi Jumabek Qarajanovtyń fotosyn ornatyp, onyń atynan birneshe adamǵa habarlama jazǵan.
J. Qarajanov alaıaq jibergen habarlamalarǵa senbeýge shaqyrdy.
«Qaıyrly kún áleýmettik jeli qoldanýshylary. «Internet-alaıaqtyq» uǵymy jergilikti atqarýshy organǵa da jetkenin habarlaǵandy jón sanaımyn. Búgin +7 775 634 8727 abonenti WhatsApp arqyly birneshe azamatqa meniń atymnan habarlama taratqan. Atalǵan nomerdiń negizgi sýretine meniń jeke sýretimdi ornatqan. Barsha turǵyndarǵa, meni jeke tanıtyn azamattarǵa atalǵan nómirden nemese siz tanymaıtyn ózge nómerden habarlama kelse mán bermeı, jaýap bermegen jón ekendigin málimdeımin. Óz kezegimde qazirgi ınternet-alaıaqtyq boıynsha zań sheńberinde áreket etýdemin», - dep jazdy Facebook-tegi paraqshasynda Jumabek Qarajanov.
Oblystyq polıtsııa departamenti baspasóz qyzmetiniń málimetinshe, alaıaqtardyń qurbany bolǵan kez kelgen adam polıtsııaǵa shaǵym túsire alady.
«Ár adam ózine qatysty quqyqqa qarsy áreketter josparlanyp otyr dep kúdiktense, dereý polıtsııaǵa habarlasýy kerek. Telefon qońyraýy, sms-habarlama men beıtanys adamdardan usynystar túsken kezde sabyrlyq saqtaý, quqyq qorǵaý organdaryna dereý habarlaý, aqparatty tekserý úshin týystarymen baılanysý qajet», - dep málim etti departamenttiń baspasóz qyzmetinen.
Eske salaıyq, budan buryn Atyraýda týrıstik fırma 50-den astam adamdy aldaǵanyn jazǵan edik.
