Alaýgerler Ýnıversıada alaýyn qalaı tasymaldaý kerektigin úırenip jatyr
Tehnıkalyq mamandardan quralǵan arnaıy top Ýnıversıada alaýyn saqtaıtyn kolbany estafeta kezinde búkil Qazaqstan arqyly tasymaldaýǵa kómektesetin bolady.
Onyń ishinde ushaqpen qaýipsiz tasymaldaýǵa basymdyq berildi.
Top músheleri ushaqpen tasymaldaý kezinde jolaýshylar salonynda arnaıy quraldar kómegimen kolbany qalaı durys bekitý qajet, tótenshe oqıǵalar kezinde qandaı qadamdar jasaý kerek ekenin úırendi. Oqý jattyǵý ushaq salonyna uqsatyp salynǵan arnaıy bólmede ótti.
Ýnıversıada alaýy arnaıy kolbada nemese «Devı shamynda» tasymaldanady. Devı shamy 19 ǵasyrda Anglııada jasap shyǵarylyp, shahtada jumys jasaý kezinde qoldanylǵan. Qazirgi zamanǵy Devı shamynyń jezden jasalynǵan berik metall korpýsy, otynǵa arnalǵan germetıkalyq bóligi jáne otqa janbaıtyn shynysy bolady. Shamnyń joǵarǵy bóliginde gaz shyǵyp ketken jaǵdaıda ottyń taralýyna jol bermeıtin arnaıy tor ornatylǵan. Osy shamnyń kómegimen 2014 jyly Sochıde ótken Qysqy Olımpıadanyń alaýy tasymaldanǵan bolatyn.
«Qazaqstannyń árbir óńirine jáne Astana qalasyna biz osyndaı shamnyń bireýin jiberemiz, onyń kómegimen Ýnıversıada alaýyn Almatyǵa jetkizemiz. Alaý óńirlerde tutatylady, Ýnıversıadanyń ashylý saltanatyn osy alaýmen ótkizemiz», - dedi Almatydaǵy 28-shi dúnıejúzilik qysqy Ýnıversıada alaý estafetasynyń tehnıkalyq mamany Sergeı Vıard.
Ýnıversıada alaýgerleri arnaıy irikteýden jáne daıyndyqtan ótken, estafeta kezinde Ýnıversıada alaýyn tasymaldap, onymen ilese júretin top. Ótkizilgen semınarǵa 15 adam qatysty, olardyń árqaısysy alaý estafetasyn ótkizý úshin Qazaqstannyń túrli aımaqtaryna jiberiledi.
Alaýgerler tobyna sportpen shuǵyldanatyn ártúrli ýnıversıtetterdiń stýdentteri kirdi.
Árbir oblys ortalyǵy, Astana jáne Almaty qalalary aımaqtaǵy eń iri joǵarǵy oqý ornynda Alaýdy tutatýǵa arnalǵan óz saltanatty sharasyn ótkizedi. Óńirdiń eń úzdik stýdenti alaýdy Almatyǵa jetkizip, Ýnıversıadanyń ashylý saltanatynyń sharyqtaý sátinde 16 oblystan ákelingen alaýdyń barlyǵy bir ýaqytta biriktiriletin bolady.
