Alataýda aerotaksı qashan qoldanysqa beriledi
ASTANA. KAZINFORM — Bıyl tehnıkalar tolyq ári jan-jaqty tekseristen ótkiziledi. Bul jóninde QR Premer-mınıstriniń orynbasary Qanat Bozymbaev Memleket basshysynyń Alatau City jobasyna qatysty tapsyrmalaryn iske asyrý jónindegi baspasóz konferentsııasynda málimdedi.
— Kólik mınıstrligi testileýge arnalǵan ýaqytsha normalar daıyndady. Aerotaksıdiń ushýyna testileý maqsatynda ýaqytsha ruqsat berilip otyr. Qazir ushatyn baǵyttar, jeldiń áseri naqtylanyp jatyr. Jyl boıy tehnıkalar ushady, olardy synaqtan ótkizemiz. Óıtkeni, marshrýttar óte kóp. Alataýdan Almaty áýejaıy men vokzalyna, Qonaevqa, Qapshaǵaı sý qoımasyna baǵyttar qarastyrylyp jatyr. Bul marshrýttar taý klasterimen baılanysty. Sondyqtan jyldyń 4 maýsymynda qandaı bıiktikte ushý kerek ekeni naqty anyqtalýy tıis. Aeromagnıtti aımaqtar men joǵaryvoltty syzyqtar da eskeriledi. Óıtkeni, munyń bári azamattardyń qaýipsizdik máselesine kelip tireledi. Sondyqtan bıyl tolyqtaı tekseristen ótkizsek, kelesi jyly qoldanysqa berilýi múmkin, — dedi ol.
Sondaı-aq, vıtse-premer bul sektordaǵy úzdik kompanııalar Qytaı men AQSh-ta ekenin atap ótti. Qazir bul elderden mamandar tartylyp, birlesken jumystar júrip jatyr.
Bul jobany júzege asyrýǵa qarjy memleketten emes, otandyq kompanııalar men ınvestorlardan bólinedi. Sonymen qatar, aerotaksıler jolaýshylardy ǵana emes, júkti de tasymaldaıdy.
Aıta keteıik, buǵan deıin Alataý qalasynda aerotaksı usha bastaǵanyn jazǵanbyz.
