Alash zııalylaryna 240 gektar aýmaqty quraıtyn memorıaldyq keshen salynady
Alash zııalylaryna arnalǵan memorıaldyq keshen SQO Jambyl aýdany Blagoveşenka aýylynyń mańynda boı kótermek. Bul jerdiń tańdap alynýy kezdeısoq emes. Osydan shamamen ǵasyr buryn, ıaǵnı 1918 jyly eldi meken mańyndaǵy Áltı qajynyń qonysynda Mirjaqyp Dýlatov bastaǵan alashordashylardyń uıymdastyrýmen úlken jıyn ótken. Oǵan Alash qaıratkerleri, Kókshetaý jáne Petropavl ýezderiniń bolystary, ıgi jaqsylar qatysqan eken.
«1918 jyly Soltústik óńirde bolshevıkter úkimeti qulap, negizgi bılikti Alash qaıratkerleri qolyna alǵan edi. Sol ýaqytta jaz aıy – shildeniń aıaǵynda Petropavl, Kókshetaý ýezderiniń 22 bolysyn jınaı otyra jıyn ótkizedi. Alaıda S.Muqanovtyń kitabynda 10 myńǵa jýyq halyq jınaldy deıdi. Tarıhı mańyzy zor jıynda Alash úkimetin qurý jáne onyń ári qaraı qyzmeti, salyq jınaý, Alash armııasyn qurý sekildi úlken máseleler qaraldy. Bul derektik negizde anyqtalyp, bıyl bul oryn memleket tarapynan qorǵaýǵa alyndy. Qazaqstannyń kıeli jerleriniń jalpy ulttyq nysanyna engizildi. Bul bizdiń bolashaǵymyz. Eger biz tarıhymyzdy bilmesek, bolashaǵymyzdy qura almaımyz. Bul bizdiń jańa Qazaqstanymyzdyń ilgeri jyljýynyń bir qadamy dep sanaımyz», - deıdi Soltústik Qazaqstan memlekettik arhıviniń dırektory Sáýle Málikova.
Bul jerde mádenı-tarıhı klasterdi júzege asyrý josparda bar. Osyǵan oraı memorıaldyq keshenniń ornyna belgi tas qoıyldy. Saltanatty is-sharaǵa Petropavl men Qostanaı qalalarynyń tarıhshylary, ǵalymdary qatysty.
«Orynbordan Mirjaqyp Dýlatov basqarǵan Alashtyń basshylary osynda kelip, Alashty qoldaıtyn azamattarymen, Alashtyń fılıaldarynyń basshylarymen jınalys ótkizdi. Soǵan 150-200-deı ókil qatysady dep josparlanǵan eken. Al shynynda kúlli osy mańaıdaǵy bostandyqty ańsaǵan - Kókshetaýdan, Aqmoladan, Qorǵannan, Ombydan osy Qyzyljar óńirinen, 10 myńnan astam halyq jınalǵan eken.
Byltyr alǵash ret osy jerde halyqaralyq konferentsııa ótkizdik. Bizdiń, kórshi memleketterdiń ǵalymdary, alash zertteýshiler qatysyp, úlken qarar, usynystar qabyldadyq. Sonyń biri - osy qasıetti jerge memorıaldyq keshen salý.
Áltı qajy kezinde baı, búginginiń tilimen aıtqanda metsenat bolǵan. Alashtyń jınalysyn uıymdastyryp, kelýshilerge júzden astam kıiz úı qurǵan eken. Alashtyń basshylaryn kútip alyp, aıaǵynan tik turyp qyzmet kórsetken», - deıdi is-sharaǵa Nur-Sultan qalasynan arnaıy kelgen saıası qýǵyn-súrgin qurbandaryn tolyq aqtaý jónindegi memlekettik komıssııa múshesi Sabyr Qasymov.
Keshenniń jalpy aýmaǵy 240 gektardy quramaq. Onda mýzeı bolady. Sonymen qatar ortadaǵy kól tazartylyp, ol keıin demalys ornyna aınalady. Sondaı-aq, etnoaýyl qurylady.
Alash zııalylaryna arnalǵan memorıaldyq keshen 3 jylda salynyp, 2025 jyly ashylady.
