Alan Qurmanǵalıev ústel tennısinen Qatardaǵy týrnırde eki medalǵa ıe boldy
ASTANA.KAZINFORM - Ústel tennısinen Qazaqstan quramasynyń ókili Alan Qurmanǵalıev Qatardyń Doha qalasynda ótken WTT Youth Star Contender halyqaralyq týrnırinde eki márte júldeger atandy.
Jekeleı synda qazaqstandyq sportshy bes márte jeńiske jetip, jartylaı fınalǵa deıin jetti. Bul kezeńde ol komandalyq jarystarda jastar arasyndaǵy álem chempıonatynyń kúmis júldegeri Abhınandh Pradhıvadhıge (Úndistan) jol berdi. Osylaısha Alan jartylaı fınalǵa jetkeniniń arqasynda qola júlde aldy.
QR UOK málimetinshe, Alan juptyq synda da úshinshi orynǵa ıe boldy. Ol bul jarysta Lıtva ókili Ignas Sısanovaspen birge óner kórsetti.
Aıta keteıik, qazaqstandyq tennısshi Zańǵar Nurlanuly jasóspirimder arasynda Aýstralııa ashyq chempıonatynyń úshinshi aınalymyna ótti.
Krıstına Sılaeva Germanııadaǵy álem kýbogi kezeńinde tórtinshi oryn aldy.