Alakóldiń 13 km jaǵalaýy qaýipti kúıde tur

NUR-SULTAN. QazAqparat – Almaty oblysynyń Alakól aýdany Kóktuma aýylyndaǵy kól jaǵalaýyn bekitý jumystary turalap tur. Oblys ákimi másele merdigerdiń jaýapsyzdyǵynan bolsa, kelisimshartty buzý qajettigin aıtty, dep habarlaıdy QazAqparat aımaq basshysynyń baspasóz qyzmetine silteme jasap.

Merdigermen kelisimshart jasasqan oblystyq qurylys basqarmasynyń málimetine qaraǵanda, 13 shaqyrymǵa belgilengen bekitý jumystarynyń 3 shaqyrymy Kóktuma aýylynan ótedi. Merdigerdiń jaýapsyzdyǵynan jumys toqtap tur. Osy jumysqa bıyl 500 mln teńge jergilikti bıýdjetten bólindi. Jaǵalaýdy bekitýge qajetti materıaldar jetkizilip jatyr. Jýyrda jumys qaıta jandanbaq.

«Eki jylda nátıje joq bolsa, onyń úsh sebebi bolýy múmkin. Ne memlekettik organ jobany durys daıyndamaǵan, ne qarjylandyrý kesheýildegen, ne merdigerdiń jaýapsyzdyǵynan bolyp otyr. Al merdiger jaýapsyz bolsa, kelisimshartty buzý qajet. Eń aldymen, durys merdigerdi anyqtaý kerek. Mamyr aıy bastalýǵa jaqyn, al olar áli materıal daıyndap jatyr. Bulaı bolmaıdy, kelesi dúısenbide búkil qujattardy aldyma alyp kelip, jaǵdaıdy baıandaısyz. Bul jumys meniń jeke baqylaýymda bolady» , - dedi Qanat Bozymbaev oblystyq qurylys basqarmasynyń basshysyna.

Máseleni oblys ákiminiń aýdanǵa sapary barysynda aýyl turǵyny kótergen bolatyn. Aıtýynsha, Alakóldiń jaǵalaýyn bekitý jumystary 2020 jyly bastalǵan. Bar jasalǵany - 800 metr ǵana, sonyń ishinde Kóktumaǵa tıesilisi - 200 metr. Al, kól sýy bolsa aýyldyń bir kóshesin alyp, ekinshi kósheniń 500 metr jolyn shaıyp ketken.

Buǵan deıin habarlanǵandaı, Alakólde bıyl 1,5 mln jýyq adam demalady degen jospar bar. Jańa demalys maýsymynda Alakólge jaqsartylǵan poıyz vagondary qatynaıdy.