Áli de úsh oblysta tasqynǵa qarsy sharalar jalǵasyp jatyr
ASTANA. KAZINFORM — Dál qazir Atyraý, Soltústik Qazaqstan jáne Aqtóbe oblystarynda áli de sý tasqynymen jáne onyń saldarymen kúres jalǵasyp jatyr. Tótenshe jaǵdaı mınıstrligi osy saǵattaǵy jaǵdaıdy baıandady.
Atyraý oblysynda Jaıyq ózeniniń boıynda uzyndyǵy 346,2 km bógen salyndy.
Bul sý tasqynyna qarsy úıindi bógender Jaıyq ózeniniń arnasynan shyǵýyn tejeıdi jáne sýdyń Kaspıı teńizine qaýipsiz ótýine múmkindik beredi.
Búgingi kúni sýdy ótkizý, aldyn alý sharalaryn júrgizý úshin 37 eldi mekende táýlik boıy kezekshilik uıymdastyryldy. Qurmanǵazy aýdanynda 1 km bógen salý qaldy.
Salynǵan bógenderdi qosymsha nyǵaıtý jumystary júrip jatyr.
Jaıyq ózeniniń sý deńgeıine monıtornıng júrgizilýde, onyń birtindep kóterilip jatqany baıqalady.
Jaıyq-Inderbor jáne Jaıyq-Mahambet sý beketterindegi sý deńgeıi shektik belgidlen asyp tústi. Jaǵdaı baqylaýda.
Qulsary qalasynda sý basqan úılerden sý sorý jumysy jalǵasyp jatyr. Ótken táýlikte 66 044 tekshe metr sý soryldy.
Ótken táýlikte Soltústik Qazaqstan oblysynyń Petropavl qalasy men Qyzyljar aýdanynda 333 070 tekshe metr erigen qar sýy sorlyp, 165 turǵyn úıden sýdyń baǵyty burylyp, sý soryldy, 111 qurǵatylǵan úıde dezenfektsııalyq jumystar júrgizildi.
Petropavl qalasynyń Borkı kenti men Karernaıa kóshesinde sý basqan úıler joq. Kún saıynǵy aerovızýaldy tekserý jáne qurǵatylǵan aýmaqty dezenfektsııalaý jumystary jalǵastyrylýda.
Aqtóbe oblysynyń Yrǵyz aýdanynda bógetterdi nyǵaıtý jumystary jáne Torǵaı ózeni sý deńgeıine monıtorıng jalǵasyp jatyr.
Ótken táýlikte Quılys jáne Jaısańbaı aýyldarynda 2 350 qapshyq pen 217 tonna ınertti materıal tóseldi, uzyndyǵy 640 metr salynǵan bógender nyǵaıtylýda.
Respýblıka boıynsha 18,5 mln erigen qar sýy sorlyp, 11 134 turǵyn úı men 3 350 aýla aýmaǵynan sýdyń baǵyty buryldy.
54 755 adam óz úılerine oraldy. 5 291 adam ýaqytsha pýnktide turyp jatyr.
Avarııalyq-qutqarý jáne sý tasqynyna qarsy jumystarǵa 7 537adam, 997 tehnıka, 297 sý sorý quraly jáne 55 júzý quraly, 6 áýe kemesi jumyldyryldy.
