Aqyn SháHızada Ábdikárimovtiń mereıtoıyn aýyldastary atap ótti

  QYZYLORDA. QazAqparat-Uzandar úni terbegen uly dalada ósip, alǵashqy óleńderimen-aq ulttyq poezııaǵa ózgeshe órnek salǵan Shahızada Ábdikárimovtiń 60 jyldyq mereıli toıyn jerlesteri joǵary dárejede atap ótti,dep habarlady QazAqparat HAA tilshisi Qarmaqshy aýdandyq ákimdigine silteme jasap.

«Jańajol» aýyldyq mádenıet úıinde mereıtoı ıesine arnalǵan ádebı-sazdy keshti aýyldyq okrýg ákimi Baqytbek Táýekelov ashyp, aqynnyń ómir jolyna toqtaldy. Shaıyrdyń shyǵarmashylyq joldaryn baıandap, ıyǵyna shapan jaýyp, syı-qurmet kórsetti. Keshte Qylyshbek Ábishev pen «Jańajol» jaýapkershiligi shekteýli seriktestiginiń tóraǵasy Orynbasar Tólepovter aqynǵa ózderiniń júrekjardy izgi tilekterin jetkizdi.   Aýyl turǵyndary atynan Úsen Toǵyzbaev  jyly lebizin arnap, Dostyq Tileýbergenov óziniń arnaýyn oqyp berdi. Mektep oqýshylary ádebı-sazdy montaj qoıyp,  aqynnyń shyǵarmalarynan  úzindiler oqydy.

Ádebı-sazdy kesh barysynda mereıtoı ıesi mektep kitaphanasyna 50 dana, aýyldyq kitaphanaǵa 150 dana kitap syılasa, aýyldyq mádenıet úıine Turmaǵambettiń «Shahnamasyn»  tartý etti.

 Shara sońy aýdan kórkemónerpazdarynyń kontserttik baǵdarlamasyna ulasty.