Aqylbek Kúrishbaev agrarlyq salany sýbsıdııalaýdaǵy 3 máseleni atady
«Memleket basshysy Qasym-Jomart Toqaev Agroónerkásiptik keshendi sýbsıdııalaýdaǵy jaǵdaıdy túbegeıli jaqsartý jóninde naqty nusqaýlar berdi. Osy salada jaqynda jarııa bolǵan memlekettik qarajatty jappaı urlaý faktilerine azamattarymyz óz narazylyqtaryn ádil bildirýde. Biz qarastyryp otyrǵan bıýdjette agrarlyq salany sýbsıdııalaýǵa 2022 jyly 303 mlrd teńge bólý josparlanyp otyr», - dedi ol Senattyń jalpy otyrysynda.
Onyń atap ótýinshe, osydan on jyl buryn aýyl sharýashylyǵynda 15 túrli sýbsıdııa bolǵan. Al sońǵy jyldary olardyń sany 51-ge deıin ósti, ıaǵnı 3,5 ese artty. Biraq budan memlekettik qoldaýdyń tıimdiligi asa artqan joq.
«Munyń sebebi osy saladaǵy kelesideı júıeli úsh másele bolyp tabylady. Birinshiden, kóptegen memlekettik qoldaý túrleriniń maqsaty túpkilikti nátıjege jetýge emes, aralyq tehnologııalyq protsesterdi oryndaýǵa baǵyttalǵan. Óz kezeginde, sýbsıdııa alýshynyń jaýapkershiligi de joq, óıtkeni erejelerde jumys nátıjeliliginiń naqty ındıkatorlary anyqtalmaǵan», - dedi Aqylbek Kúrishbaev.
Ekinshiden, senator sýbsıdııa bólý erejelerinde belgilengen sáıkestiktiń kóptegen krıterııleriniń anyqsyzdyǵynan, osy baǵdarlamalardy ákimshilendirýdiń kúrdeliliginen sybaılas jemqorlyqtyń oryn alý deńgeıi joǵary ekendigin aıtty.
«Úshinshiden - kóptegen aýyl sharýashylyǵy taýaryn óndirýshiler úshin sýbsıdııalardyń qoljetimsizdigi. Sýbektilerdiń, negizinen orta jáne usaq sharýashylyqtardyń 80 paıyzy memlekettik qoldaý sharalaryna qol jetkize almaıdy. Sonymen qatar, durys josparlanbaǵandyqtan, aýyl sharýashylyǵy taýaryn óndirýshiler bekitilgen kvotalar aıasynda da sýbsıdııa ala almaıdy, bul memlekettik qoldaý júıesiniń boljaýsyzdyǵyna ákelip, salaǵa ınvestıtsııalardy tartýda edáýir tejegish bolyp sanalady», - dedi Senat depýtaty.
