Aktrısa Samal Eslıamova referendýmda daýys berdi

PETROPAVL. QazAqparat – Petropavlda belgili aktrısa Samal Eslıamova konstıtýtsııalyq quqyǵyn paıdalanyp, № 595 referendým ýchaskesinde daýys berdi, dep habarlaıdy QazAqparat tilshisi.

Petropavldaǵy balalar men jasóspirimderdiń shyǵarmashylyǵy ortalyǵynda ornalasqan № 595 referendým ýchaskesinde belgili aktrısa, Kann festıvaliniń úzdigi atanǵan Samal Eslıamova daýys berdi.

Soltústik Qazaqstan oblysy Aralaǵash aýylynyń týmasy bul joly da tańdaýyn týǵan jerinde jasady. Sol úshin astanadan arnaıy kelgen.

«Adam balasy bolǵan soń jaqsylyq kútemiz, úmitimiz zor. Konstıtýtsııalyq túzetýlerdiń jalpy negizgi ıdeıasy – memlekettik qurylys nysanyn ózgertý ǵoı. Bolashaqqa senimim zor, ómir súrý deńgeıi tek jaqsara túsedi dep oılaımyn. Ol úshin ár qazaqstandyq ta jumys isteýi kerek», - deıdi Samal Eslıamova.

Jalpy bul referendým ýchaskesinde 1336 petropavldyq tirkelgen.

«Jalpy, daýys berýge tańerteńnen kóbinese egde jastaǵy adamdar keldi, túske qaraı ádette jastar keledi. Alǵash ret daýys berip jatqandardyń sany 15 adam. Osy ýaqytqa deıin 1 soǵys ardageri jáne 20 tyl eńbekkeri tańdaýyn jasap ketti», - deıdi № 595 ýchaskelik referendým komıssııasynyń tóraǵasy Qanat Sádýaqas.

Buǵan deıin SQO-daǵy saılaý ýchaskelerinde jármeńke uıymdastyrylǵanyn aıtqan edik.

Al SQO-daǵy tergeý ızolıatorynda otyrǵan 155 adam referendýmǵa qatysty.