Aqtóbeniń keıbir turǵyn alabynda jaryq sónip, sý berý shektelip jatyr
AQTÓBE. KAZINFORM – Aqtóbede myńdaǵan abonent jaryqsyz, keıbiri sýsyz qaldy.
Aqtóbe oblysynda aqtútek boranǵa baılanysty kommýnaldyq qyzmetter kúsheıtilgen rejımge kóshti. Sonyń ishinde jaryqqa jaýapty «Energosıstema» JShS-i qalada 15 brıgada shyǵardy. Sebebi qala ishinde ǵana emes, turǵyn alaptary men aýdandarda elektr symynan aqaý shyǵyp jatyr.
– Keshe túnnen beri kúsheıtilgen rejımge kóship, kúndiz-túni jumys istep jatyrmyz. Qazir qala boıynsha 15 brıgadada 50-den astam adam bar. Qala ishimen qatar Qýraıly, Qurashasaı, Baýyrlastar turǵyn alaptarynda avarııalyq jóndeý jumystary júrip jatyr. Sonymen birge Oıyl, Baıǵanın, Temir, Muǵaljar, Alǵa aýdandarynda da avarııalyq sóný jumysy boldy. Mamandar men tehnıka jetkilikti. Tek kóz kórinbes boran bolyp, dittegen jerge jete almaı otyrmyz. Kompanııanyń atqarýshy dırektorynyń ózi shyǵyp, shynjyr tabandy eki kólik jáne arnaıy tehnıka jiberildi. Qalanyń ishinde Shanhaı, Máskeý, Baýyrlastar-5, Zarechnyı, Saıajaı turǵan alaptarynda jaryǵy sóngen abonentter bar. Birin jóndep úlgerip jatyrmyz, keıbiri qaıta sónedi. Barlyǵy 2-3 myń bolady qalada. Aýdan boıynsha shamamen 2 myńdaı abonent bolýy múmkin. Jel kúshti bolǵan soń symdar bir-birine soǵyp, keri áserin tıgizdi. Qulaǵan baǵana, úzilgeni joq, - dedi «Energosıstema» JShS bas ınjeneri Asqar Bekturǵanov.
Sonymen birge sý berý de shektelip jatyr.
– Qalany sýmen, jylýmen qamtý turaqty júrip tur. Tek aýa raıyna baılanysty kóptegen jerde elektr qýaty joq. Al sý aıdaıtyn nasostardyń barlyǵy elektr qýatymen jumys isteıtini belgili. Bizde de ártúrli jaǵdaı bolyp jatyr. Birese sý beriledi, birese jaryqtyń sónýine baılanysty toqtap qalady. Baýyrlastar 1, 2, Sazdy turǵyn alabynda sý joq qazir. Sonymen birge Tamdy sý qoımasynda elektr togy joq. Sút zaýyty aýdany, Áýe qalashyǵy, Máskeý, Bolashaq, ıÝnıs sıtı, 11 jáne 12 shaǵyn aýdardarynda sýǵa shekteý bolyp jatyr, - dedi «Aqtobe su-energy group» AQ bas ınjeneri Amangeldi Boranqulov.
Eske salsaq, Aqtóbede sabaq onlaın ótip jatyr. Sonymen birge 7 baǵytta avtobýs toqtap, turǵyn úıdiń shatyry ushty.
