Aqtóbeniń burynǵy ákimin aldaǵan sottalýshy bas bostandyǵynan aıyryldy

Aqtóbeniń burynǵy ákimi Ermek Imantaevty qylmystyq qýdalaýdan qutqaramyn dep kompanııadaǵy úlesi men aqsha alǵan N.Baltaev 5 jylǵa bas bostandyǵynan aıyryldy, dep habarlaıdy Kazinform. 

№2 Aqtóbe qalalyq sotynda búgin Qylmystyq kodekstiń «Alaıaqtyq» baby boıynsha aıyp taǵylǵan Nurlan Baltaevqa úkim shyqty. Aqtóbe oblysynyń burynǵy ákimi Ermek Imantaevty aldap ketken Baltaev sot úkimimen 5 jylǵa bas bostandyǵynan aıyryldy.

«Sot taraptardyń pikirin tyńdap, kináni moıyndaý týraly mámile nysanyndaǵy protsestik kelisimi Qylmystyq protsestik kodekstiń talaptaryna sáıkes keledi degen qorytyndyǵa keldi. Sot N.Baltaevty Qylmystyq kodekstiń 190-babynyń 4-bóligi 2-tarmaǵymen kináli dep tanyp, oǵan 5 jyl merzimge bas bostandyǵynan aıyra otyryp, JShS jarǵylyq kapıtalyndaǵy úlesiniń 70% memleket paıdasyna tárkileý jazasyn taǵaıyndady. Іs boıynsha talap qoıylǵan joq», - dep habarlady Aqtóbe qalasy №2 sotynyń baspasóz qyzmeti.

Eske salsaq, Aqtóbeniń burynǵy ákimi Ermek Imantaev pen sottalýshy Nurlan Baltaev 2007 jyly tanysyp, bir-birimen aralasyp turǵan. Qylmystyq is qozǵalǵan kezde qaıta kezdesip, Baltaev jazadan qutqaryp qalýǵa ýáde berip, aqysyna 100 mln teńge surady. Ermek Imantaev senim artyp, aqsha jáne «Kapıtal ınvestment grýpp» JShS-niń 70% úlesin qosa eseptegende shamamen 229 mln teńgeden astam qarjy berdi. Sottalýshy sotqa deıingi tergep tekserý kezinde kináni moıyndap, protsestik kelisim jasaldy. 

Sot úkimi zańdy kúshine engen joq.