Aqtóbeniń bas dańǵylynda kólikti teris aıdaǵan júrgizýshi aıyppul tóleıdi

AQTÓBE. KAZINFORM – Aqtóbe qalasy Ábilqaıyr han dańǵylynda qarsy baǵytqa shyǵyp, kólikti keri aıdaǵan júrgizýshi anyqtaldy. Ákimshilik quqyqbuzýshylyq týraly kodekstiń úsh baby boıynsha 5 hattama toltyryldy.

Aqtóbe oblystyq Polıtsııa departamenti áleýmettik jelige monıtorıng jasady. Onda Aqtóbe qalasy Ábilqaıyr han dańǵyly boıynda jol erejesin buzǵan júrgizýshini anyqtady.

- Toyota avtokóliginiń júrgizýshisi kortejde júrip, óz baǵytynan keri qaraı qozǵalǵan. Patrýldik polıtsııa qyzmetkerleri quqyq buzýshyny anyqtap, oǵan birneshe ákimshilik hattama toltyrdy. Avtokólik arnaıy avtoturaqqa qoıyldy. Kólik júrgizýshisine túsindirildi, - dedi Aqtóbe qalasy PB PPB-nyń Vzvod komandıri Qudaıbergen Jıenalıev.

Aıta keteıik, júrgizýshi Ákimshilik quqyqbuzýshylyq týraly kodekstiń 590 baby 2 bóligi (Kólik quraldaryn paıdalaný qaǵıdalaryn buzý), 595 baby 2 bóligi (Manevr jasaý qaǵıdalaryn buzý) jáne 230 baptyń 2 bóligimen (Qazaqstan Respýblıkasynyń mindetti saqtandyrý týraly zańnamasyn buzý) ákimshilik jaýapqa tartyldy. Oǵan bir kúnde 5 hattama toltyrylǵan. Bir hattama boıynsha eskertý berilse, tórteýi boıynsha 137 620 teńge aıyppul salyndy. Júrgizýshi apta ishinde aıyppulyn tólese, soma eki ese qysqarady.

Eske salsaq, Áıteke bı aýdandyq aýyl sharýashylyǵy jer qatynastary bóliminiń basshysy Aqylbek Isataev mas kúıinde kólik júrgizip, 15 táýlikke qamaldy.