Aqtóbelik oqýshylar úshinshi kún qatarynan onlaın oqıdy

AQTÓBE. KAZINFORM — Erteń de oblystaǵy barlyq mektep oqýshysy qashyqtan bilim alady. Sonymen birge kolledjdiń 1-2 kýrs stýdentteri onlaın oqıtyn boldy.

Aqtóbe oblystyq bilim basqarmasy 28-qańtar kúni 1-11 synyp oqýshylary men tehnıkalyq jáne kásiptik bilim berý uıymdarynyń 1-2 kýrs bilim alýshylary qashyqtan oqıtynyn habarlady. Óńirde mektep oqýshylary dúısendiben bastap mektepke barmady. Qatty aıazda jergilikti basqarma balalardy qashyqtan oqytýǵa sheshim qabyldady.

Sınoptıkterdiń habarlaýynsha, erteń oblysta kún ashyq bolady. Soltústik-shyǵystan soǵatyn jel ońtústik-shyǵysqa aýysyp, kúshi sekýndyna 5-10 metrge jetedi. Aýa temperatýrasy túnde -25-30, oblystyń ońtústiginde -21, kúndiz -13-18 gradýs aıaz bolady. Al Aqtóbe qalasynda kún raıy azdaǵan bultty dep boljandy. Aýa temperatýrasy túnde -26-28, kúndiz -13-15 gradýs aıaz bolady.

Aıta keteıik, erteń Astanada aýa raıyna baılanysty birinshi aýysymnyń 0-6 synyp oqýshylary qashyqtan oqytý formatyna aýystyrylady.