Aqtóbelikterdiń 93 paıyzy qazaq tilin biledi

AQTÓBE. QazAqparat - Aqtóbelikterdiń basym bóligi qazaq jáne orys tilderin jetik meńgergen. Al ózge ult ókilderiniń 45 paıyzy memlekettik tildi biledi, dep habarlady QazAqparat tilshisi.

Óńirdegi memlekettik tildi úıretý, damytý jumystary jaıly Aqtóbe oblystyq  tilderdi damytý basqarma málimet taratty. Qazirgi kezde tildi meńgeremin degen eresekter úshin barlyq jaǵdaı jasalǵan. Sonymen qatar, qazaq, orys jáne aǵylshyn tilderin úıretý kýrstary 14 myń adamdy qamtydy. Ári qashyqtyqtan oqytý júıesi ázirlendi.

«Ózge ult jastarynyń arasynda tolerantty orta qurý maqsatynda memlekettik jáne ana tilderin úırenýge turaqty jumys istep tur. Búgingi kúni 4 myńǵa jýyq ártúrli etnos ókili jeksenbilik mektepterde bilim aldy. Oblysymyzda turatyn joǵary býyn ókilderiniń 93% - qazaq, 93,8 % - orys,  26,6% - aǵylshyn tilin biledi. Al memlekettik tildi meńgergen ózge ult ókilderiniń úlesi 45 paıyzdy quraıdy», - dedi basqarma basshysy Gúlaıym Tólebaeva.

Til úıretý, balalardyń tanymdyq qabiletin arttyrý maqsatynda «Kúnshýaq» balalar jýrnaly, «Men úsh tilde sóıleımin» balalarǵa arnalǵan sózdik, «Tilderdi oqytý: izdenis jáne ádisteme» aqparattyq-ádistemelik jýrnaly shyǵaryldy.  Táýelsizdik alǵan jyldary 167 eldimekenniń 146-syna tarıhı ataýlary qaıtaryldy.