Aqtóbelikter memlekettik baǵdarlamalardyń arqasynda baspanaly boldy
Táýelsizdik kúnine arnalǵan merekelik shara kezinde Aqtóbe qalasynyń ákimi Mavr Abdýllın óńir turǵyndaryn quttyqtady. Sonymen qatar «Nurly jer» jáne «Baqytty otbasy» baǵdarlamalary boıynsha baspanaly bolǵan 10 otbasyna páter kiltin tabystady.
«Biz 2009 jyldan beri kópbalaly otbasy sanaty boıynsha páter kezeginde turmyz. Ózim úı sharýasyndamyn, joldasym júrgizýshi bolyp jumys isteıdi. Páter jaldap júrgenimizge 15 jyl toldy. Búgin «Nur Aqtóbe» yqsham aýdanyndaǵy 3 bólmeli páterge ıe boldyq. Páter quny - 9,8 mıllıon teńge. Bastapqy jarnanyń teń jartysyp, ıaǵnı, 490 000 teńgeni ákimdik berdi. Bul qaıtarymdy sertıfıkat. Ózimiz Turǵyn úı qurylys jınaq bankindegi depozıtimizde 490 myń teńge jınaqtadyq. Nesıeni 17 jylǵa rásimdedik. Alǵashqy 7 jylda aı saıyn 57 000 teńgeden, qalǵan 10 jylda 46 300 teńge tóleımiz», - dedi «Baqytty otbasy» baǵdarlamasyna qatysýshy qala turǵyny Nasıha Kúsimova.
Osy kúni mektepte shet tili páninen sabaq beretin 27 jastaǵy jas maman da baspanaly boldy.
«Aqtóbe qalasyna 2015 jyly kóship kelip, osy kúnge deıin apam ekeýmiz týystarymyzdyń úıin panalaǵanbyz. Búgin jeke baspanamyzǵa qol jetkizdik», - dedi Samal Jekeeva. Ol 1 bólmeli páterdi 5 mıllıon teńgege aldy.
Aıta keteıik, bıyl Turǵyn úı qurylys jınaq banki arqyly 4000-ǵa jýyq aqtóbelik otbasy baspanaly boldy. Onyń 1200-ge jýyǵy «Nurly jer» memlekettik baǵdarlamasy boıynsha qarjy salǵan.
