Aqtóbelikter elordaǵa Nur-Sultan ataýyn berýdi qoldady

AQTÓBE. QazAqparat - Aqtóbede ótken jıynǵa qoǵamdyq uıym, qoǵamdyq keńes, Qazaqstan halqy Assambleıasynyń músheleri, ardagerler, sportshylar, kásipkerler, jastar, kásiporyn ókilderi qatysyp, Astana qalasyna Nur-Sultan ataýyn berýdi qoldady, dep habarlaıdy QazAqparat tilshisi.

Búgin Aqtóbedegi Qazaqstan halqy Assambleıasynyń ǵımaratyna elordanyń Nur-Sultan ataýyn qoldaǵan aqtóbelikter jınaldy. Shara barysynda oblystyq máslıhat depýtaty, Aqtóbe aýyl sharýashylyǵy kolledjiniń dırektory Amangeldi Esirkepov, «Aqtóbe» fýtbol klýbynyń bas dırektory Samat Smaqov, «Er-Baqyt» sporttyq-patrıottyq klýby» qoǵamdyq uıymynyń tóraǵasy, aýǵan soǵysynyń ardageri Marat Qoılybaev, kásipker, Aqtóbe oblysynyń isker áıelder qaýymdastyǵynyń múshesi Altynaı Muhanova, «Nur Otan» partııasy oblystyq fılıaly «Jas Otan» jastar qanatynyń tóraǵasy Asyljan Búrkitalın Astanaǵa Nur-Sultan ataýyn berýdi qoldap, óz oılarymen bólisti.

«Biz, ǵasyrlar toǵysynda dúnıe esigin ashqan jas urpaq, shyn máninde baqyttymyz! Táýelsiz elde tulǵa bolyp damýǵa barlyq jaǵdaı jasaldy. Qazirgi kúni elimizdegi balalar mektepke deıingi, mekteptegi bilimmen tolyq qamtylǵan. Mektep túlekterine alǵashqy kásip ıgerý úshin tegin kásiptik bilim de beriledi. JOO jyl saıyn bólinetin granttar sany da ulǵaıyp keledi. Álemniń kez kelgen úzdik oqý oryndarynda tegin bilim alýǵa múmkindik beretin «Bolashaq» baǵdarlamasymen 10 myńnan astam jas biliktiligin arttyrdy. Kóptegen zamandastarymyz memlekettik qoldaýdyń nátıjesinde jańadan óz kásipterin ashty. Jastarmen birge jas memleketimizde ósti. 30 jyldyń ishinde Qazaqstan álemdegi kez kelgen memleketpen terezi teń turatyn dárejege jetti. EQYU men Islam elderi konferentsııasynda tóraǵalyq ettik, álemdik deńgeıdegi EHRO kórmesin ótkizdik, Sırııa ahýalyn sheshýde mańyzdy rólge ıe boldyq. Álemniń básekege qabiletti aldyńǵy qatarly 50 memleketiniń qataryna kirdik. Joǵaryda men kórsetken jetistiktiń eki sebebi bar! Ol talaı qıyndyq bolsa da moıymaı, jasymaı ótken qazaq halqy jáne halyqty basqarǵan tuńǵysh Prezıdent Nursultan Nazarbaev. Dáýirler toǵysynda tutas memleketti aıaǵyna turǵyzqan tulǵa, jalǵyz astanany ǵana emes, eldi qaıta salǵan azamatqa eloradanyń ataýyn berý tarıh aldyndaǵy zańdylyq pen barsha halyqtyń boryshy dep bilemin! Aqtóbelik jastar Astana qalasy ataýynyń ózgerýin qoldaıdy», - dedi «Jas Otan» Jastar qanaty Aqtóbe oblystyq fılıal tóraǵasy Asyljan Búrkitalın.