Aqtóbelik jataqhanaǵa «bomba» qoıdy

AQTÓBE. QazAqparat – Aqtóbe qalasynyń turǵyny jataqhanaǵa jarylǵysh zat qoıyldy dep jalǵan aqparat taratqany úshin ustaldy, dep habarlaıdy QazAqparat tilshisi.

Aqtóbe qalalyq polıtsııa bólimine er adam habarlasyp, Grıshın kóshesindegi shaǵyn otbasylyq jataqhana bólmeleriniń birine «bomba» qoıylǵany týraly aıtty. Oqıǵa ornyna jedel tergeý toby jáne shuǵyl qyzmetter jiberildi. Jataqhanany jan-jaǵynan qorshap, saperler kórsetilgen bólmeni tekserdi. Jarylǵysh zat tabylmady.

«Jedel izdestirý barysynda buryn sottalǵan, sol úıdiń 31 jastaǵy turǵyny ustaldy. Mas kúıinde habar bergen. Onyń aıtýynsha, bul aqparatty tártip saqshylarynyń jumysyn tekserý úshin oıdan shyǵarǵan. Qylmystyq kodekstiń «Terrorızm aktisi týraly jalǵan habarlaý» baby boıynsha sotqa deıingi tergeý bastaldy. Kúdikti ustalyp, ýaqytsha tergeý abaqtysyna qamaldy.