Aqtóbelik soǵys ardagerleri maıdandastaryn eske aldy
Aqtóbelikter búgin tańerteń Máńgilik alaý eskertkishine jınalyp, jeńis syılaǵan ata-babalaryn eske aldy. Aqtóbe oblysynyń ákimi Berdibek Saparbaev, oblystyq máslıhat, qala ákimdigi, ishki ister organdary, prokýratýra, Aýǵan soǵysynyń ardagerleri men Ekinshi dúnıejúzilik soǵysqa qatysqan maıdangerlerdiń urpaǵyn eske alý sharasyna qatysyp, eskertkishke gúl qoıdy. Búgin soǵys ardageri Ábdýálı Ismaǵulovty nemeresi máńgilik alaý mańyna alyp keldi.
«Atam Ábdýálı Ismaǵulov ІІ Ýkraına maıdanyna qatysyp, birneshe qalany azat etýge qatysty. Jeńisti Polshada qarsy aldy. Úsh ret jaralanyp, ІІ top múgedegi bolyp elge oraldy. Atam qazir 93 jasta. Qazir qartaıdy, biraq tyń. Óz erkimen júrip, turady. Negizi atamnyń maıdandastary Ýkraına elinde kóp. 9 mamyr kúni úıge qonaqtar kelip, kórshiles Orynbor oblysynan týystarymyz quttyqtaıdy. Shynymdy aıtsam, soǵys týraly kóp aıtpaıdy. Ótkendi eske alý olarǵa áli de qıyn»,- dedi soǵys ardageriniń nemeresi Eldan Ismaǵulov.
Ábdýálı Ismaǵulovtiń ata-anasy qýǵyn-súrgin kezinde halyq jaýy atanyp, atý jazasyna kesilgen. Jetim ósken jigit soǵysqa Reseıdiń Orynbor oblysynan attanyp, tank batalonynda boldy. Jeńispen oralǵan soń eńbek etip, bir ul men bir qyz tárbıeledi. Qazir 9 nemere, 6 shóberesi bar. Ardager Máńgilik alaý eskertkishine gúl qoıyp, maıdandastaryn eske alǵan jalǵyz soǵys ardageri boldy.
Keıin aqtóbelikter Álııa Moldaǵulovanyń memorıaldyq keshenine gúl qoıyp, Batyrlar alleıasymen júrip ótti. Munda 35 Uly Otan soǵysy batyry men «Dańq» ordeniniń tolyq ıegeriniń portreti qoıylǵan.
