Aqtóbelik oqýshylar Tashkent pen Samarqandy aralaıdy
Aqtóbede oblysynda ishki týrızmdi damytý úshin jan-jaqty jumys atqarylyp jatyr.
Bıyl aqtóbelik oqýshylar osy tarıhı, mádenı oryndardy aralap, Almaty, Ońtústik Qazaqstan, Jambyl, Qyzylorda oblystaryndaǵy kıeli oryndarmen tanysady. «Baqytty bala» jobasy aıasynda barlyǵy 2 myńnan astam oqýshyny qamtý josparda bar.
«Baqytty bala» jobasy aıasynda balalardy Qazaqstannyń kıeli jerlerin aralaýǵa jiberemiz. Bilimdi, daryndy, olımpıada jeńimpazdary men sportta jetistikke jetken oqýshylar arnaıy tańdalady. Bul jumysty oblystyq bilim basqarmasymen birge atqaramyz. Sonymen qatar, áleýmettik jaǵynan az qamtylǵan otbasy balalary da Qazaqstannyń tarıhı oryndaryn aralaýǵa múmkindik alady. Al Aqtóbe oblystyq týrızm jáne syrtqy baılanystar basqarmasy 100 balany Baıqońyr-Túrkistan-Tashkent-Samarqan baǵyty boıynsha saparǵa jiberedi. Bul Qazaqstan men Ózbekstan arasyndaǵy yntymaqtastyqty nyǵaıtýǵa arnalǵan jobanyń biri bolyp otyr»,- dedi Aqtóbe oblystyq týrızm jáne syrtqy baılanystar basqarmasynyń basshysy Janna Búrkitbaeva.
Aıta keteıik, Aqtóbedegi týrızmdi damytý úshin 30 ınvestıtsııalyq joba iske asyrylyp jatyr. Barlyǵy 20 jol boıynda qyzmet kórsetý orny men 7 qonaq úı, akvapark, emdeý-saýyqtyrý oryndary salynýda. Ótken jyly Aqtóbe oblysyna 77 myńnan astam qonaq kelse, bul 2016 jylmen salystyrǵanda 22 paıyzǵa kóp. Basym bóligi iskerlik kezdesýge kelgen. Al óńirdiń mádenıeti, tarıhymen tanysýǵa kelgender áli de az. Bul baǵytty damytýǵa joldyń qashyqtyǵy, qyzmet sapasynyń tómendigi, tarıhı oryndardy tanytý jumysynyń azdyǵy sebep bolyp otyr.
Qazaqstannyń kıeli jerleri qataryna oblystan 10 nysan endi. Olar: Qabylandy batyr, Eset batyr, Abat Baıtaq, Isataı batyr keseneleri, Ábilqaıyr han jerlengen Han molasy, Jamanshyń krateri, Oısylqara qorymy, Dosjan Ishan meshiti, Bopaı hanym beıiti, Eset Kótibar kesenesi.
