Aqtóbelik lańkestiń anasy uly týraly shyndyqty aıtty
Rıza Tańatarovanyń aıtýynsha, onyń uly ákesiz ósken.
«Biz ómir boıy páter jaldap turdyq. Týrgenev, Shanhaı, Ábilqaıyr han kóshelerinde, turmaǵan jerimiz joq dese de bolady. Turmysymyz tómen boldy, tapshylyqtyń zardabyn tartýyndaı-aq tarttyq. Jalǵyz basty ana retinde járdemaqy alýym qajet bolǵan, biraq turaqty tirkelgen jerim bolmaǵan soń ony da ala almadyq. Sodan soń memleketke bos jaltaqtaı bergen qajet emes dep sheshtik. Arsen 8 synyp bitirgen. Sodan keıin esh jerde oqymady. Sebebi jaǵdaıymyz bolmady. 14 jasynan bastap qurylysta túrli jumystarda kómekshi bolyp jumys istedi. Jalǵyz ózi bizdi asyrady. Sońǵy jyldary qurylysta jumys bolmady, ol káriz júıelerin tazalaý, qar kúreý sııaqty jumystarmen de aınalysty. Sosyn bazarda telefon satýǵa shyqty. Men oǵan urlanǵan telefondardy almaýyn, qujattaryn tekserýin ótinip júrdim. Ol maǵan qarsy kelip kórgen emes, «siz» dep sóılesedi», - dedi Rıza Tańatarova.
Anasy Arsen namazdy 18 jasynan oqı bastaǵanyn aıtty, juma saıyn «Nurdáýlet» meshitine baratyn. Sońǵy ýaqyttarda qalanyń eski bóligindegi bir meshitke baryp júrdi. Biraq, anasy onyń ortasynda radıkaldyq kózqaraspen adamdar bolǵan-bolmaǵanyn bilmeıdi. «Arsen qyzǵanshaq, úıge eshkimdi ákelmeıtin. Sondyqtan kimmen tyǵyz aralasqanyn bilmeımin. Ol qalanyń ár aýdandarynda turdy, sondyqtan dostary men tanystary da kóp bolatyn», - dedi Tańatarova.
Onyń aıtýynsha, Arsen Dmıtrıı Tańatarov pen Arman Aıtýǵandy tanymaıdy, sol qyrsyq shalǵan 5 maýsym kúni ol tabıǵat aıasyna serýenge shyǵýǵa ázirlengen. «5 maýsym tańerteń ol ápkesi, jezdesimen serýenge shyǵatynyn, et satyp alýǵa baratynyn aıtty. Alaıda, saǵat 12.30-dyń kezinde onyń uıaly telefony sóndirýli boldy. Oǵan bireýdiń aǵasy uldy bolyp, shildehanaǵa shaqyrǵanyn habarlaǵan. Sóıtse aldap shaqyrypty. Ulym barǵan kezde odan telefondy alyp qoıǵan», - dep Arsenniń anasy sol kúndi sıpattap berdi.
«Keıinnen tergeý abaqtysynda qylmys týraly habarlamaǵany úshin sottalyp jatqandardyń biri Arsenniń ketkisi kelgendigin, telefonyn almaqshy bolyp ketip, sodan beri ol ony kórmegen. Al bul jigit keıinirek kelgen, sondyqtan telefonyn tapsyrmaǵan, onyń jyldam ketip qalýǵa múmkindigi bolǵan. Arsenge izdeý jarııalanǵanyn estigende, shoshyp kettim. Sol páterde olarǵa emotsııaǵa áser etetin birdeńeni sýǵa qosyp bergenge uqsaıdy. Arsen júkti áıelin, meni bulaı tastap ketýi múmkin emes. Onyń dini taza boldy, saqal qoımady, sholaq balaqty shalbar da kıgen emes».
Arsenge izdeý jarııalanǵanda, anasy ápkesimen birge qala boıynsha ony ózderi izdegen.
«Bir kúni Arsen Veneraǵa (áıeli) habarlasyp, berilýge qorqatynyn, olar eskertýsiz oq atatynyn aıtqan. Arsende 5 maýsymda et satyp almaqshy bolǵan aqshasy jáne 7-si kúni páterge tóleıtin 30 myń teńgesi bolǵan. Bul aqshaǵa ol maı quıý stansasynan snıkers pen sý satyp alǵan. Satýshylar ony tanymaǵan, sebebi izdeýge 18 jasynda túsken fotony bergen, ol osy ýaqyt aralyǵynda biraz ózgergen», - dedi R. Tańatarova.
Anasynyń aıtýynsha, Arsen ózi berilgen, ol úıge keldi, onda ony áıeli men polıtseıler kútip otyrdy. «Venera polıtsııadan oǵan oq atpaýdy ótindi. Arsenniń ústi qan-qan boldy, jarasyn fýtbolkamen tańyp qoıǵan. Kıimniń ornyna jyrtylǵan kórpeshe jamylyp alǵan. Kúre tamyry kesilgen. Óz-ózine qol jumsamaq bolǵan sııaqty», - dep boljaly R. Tańatarova.
Áıeline «Pallada» dúkenine shabýyl jasalǵan ýaqytta qatty qoryqqanyn aıtqan. Áı-shaı joq atyp tastaıdy dep oılaǵan. Aıyptalýshynyń anasy Arsen boı tasalap júrgende, odan onyń ómirbaıany men qaıda jasyrynýy múmkin ekenin suraǵan.
«Bizden jaýap alǵannan keıin, sotqa ne týysy, ne qorǵaýshysy retinde qatysa almaımyz. Bizdi kýáger retinde jazǵan. Sotqa bizdi kirgizbeıdi. Eshkimmen sózge kelgim kelmeıdi. Óıtkeni olar sot úkiminen keıin Arsendi qaı túrmege aparatynyn bizge aıtpaı qoıýlary múmkin, men endi ulymdy kórmeıtin shyǵarmyn dep qorqamyn», - degen muńymen bólisti Arsenniń anasy.
«Osy tórt aıda uıqy-kúlki kórmedim, kelinniń qan qysymy kóterilip júr, bosanatyn ýaqyty keldi, biraq áli týa almaı júr. Biz advokatqa aqsha jınadyq, biraq Arsen odan bas tartty».
Rıza Tańatarova uly men basqa da aıyptalýshylar tıisti jazalaryn alýy kerektigine kelisedi. Tek Arsendi ómir boıyna bas bostandyǵynan aıyrmasa eken dep tileıdi.
«Jazyqsyz qaza tapqan jandar úshin qynjylamyn. Olardyń týystaryna shyn júrekten kóńil aıtamyn, eger osyǵan meniń ulymnyń kinási bolsa keshirim suraımyn», - dedi Arsenniń anasy.
