Aqtóbelik eriktiler shalǵaı aýyldaǵy balalarǵa aǵylshyn tilin úıretip jatyr
Aýyl balasy úshin aǵylshyn tilin úırenýde esh kedergi bolmaýy tıis. Olar da qalada bilim alatyn oqýshylar sekildi tıimdi ádisti tolyq qoldana alady. Bul joly aqtóbelikterge eriktiler kómektesti. Al ádisteme «Birgemiz: Bilim» jalpyulttyq jobasy aıasynda daıyndaldy. Aqtóbe úshin «A.Baıtursynuly Bilim akademııasy» mekemesi arnaıy oqý materıaldaryn ázirlep berdi.
«Eriktiler qatarynda stýdentter, jas muǵalimder, tájirıbeli ustazdar da bar. Dál qazirgi ýaqytta aýyl balalary aǵylshyn bilin qashyqtan meńgerip jatyr. Al bilim alýshylardyń kóbi kópbalaly, áleýmettik jaǵynan az qamtylǵan otbasynan shyqqandar. Sol sebepti keı kezde ınternetke qosylýda qıyndyq týyndaıtyny jasyryn emes. Bul bilim alamyn, oqımyn degen oqýshylarǵa kedergi bolmady. Olar mobıldi baılanysqa shyqty. Barlyǵy 11 aýdannan 250 bala qatysty. Sabaqty 15 erikti berip jatyr», - dedi eriktilerdiń óńirlik úılestirýshisi Narqozy Qartjan.
Erikti Gúlmıra Abatqyzy qazir bir topqa sabaq berip tur. Ol aýyl balalarynyń shet tilin bilýi úshin tájirıbesimen bólisti.
«Biz aldyn ala onlaın sabaq berý ádisin úırendik. Maqsat – aǵylshyn tilin úıretýde qyzyqty ádis-tásildi qoldaný. Sóıtip til úıretý, olardyń bilimin jetildirý. Balalardyń aǵylshyn tilin meńgerý deńgeıi – bazalyq. Zomm platformasymen baılanysqa shyǵamyz, keıde áleýmettik jelini qoldanamyz. Tańerteń tapsyrma beriledi, taqyryp naqtylanady. Túste olardyń aıaq alysyn, daıyndyǵyn qaraımyz. Eger suraqtary bolsa, qosymsha baǵyt beremiz», - dedi Gúlmıra Esenǵosova. Erikti aýyl balasyna basymdyq beretin jobanyń óte tıimdi ekenin aıtyp beredi. Sebebi shalǵaı eldimekenderde qosymsha sabaq alyp, repetıtorǵa barý óte sırek kezdesedi.
«Oqýshylardyń aǵylshyn tiline degen qyzyǵýshylyǵy joǵary dep aıta almaımyn. Sondyqtan óz bilimimiz ben biliktiligimizge súıenip, jańa ádisterdi de qoldanamyz. Qıyny – qashyqtan oqytý. Muǵalim men oqýshy bir-birin kórmese, túsirdirý ońaı emes. Alaıda oqýshylar keri baılanysqa shyǵyp, rızashylyqtaryn bildirip jatyr. Eshkimdi mindettemeımiz, áý basta jaýapkershilikpen qaraý qajet ekenin uǵyndyrdyq. Bilim qajet bolsa, oqýy tıis. Muny olar túsindi. Olardyń arasynda bolashaqta aǵylshyn tili mamany bolýdy qalaıtyndary da bar», - dedi Gúlmıra Abatqyzy.
Aıta keteıik, oqýshylardyń bilim deńgeıine qaraı top arasynda aýystyrýǵa múmkindik berildi. Tildi meńgerý qabileti joǵary balalar úzdikter qataryna qosylsa, keıbiri bazalyq deńgeıden bastady. Aldaǵy ýaqytta Aqtóbede pándik olımpıada, ǵylymı jobalarǵa daıyndyq kýrstary ótedi. Qazir olarǵa dáris beretin eriktiler iriktelip jatyr.
