Aqtóbedegi JOO-ǵa bomba qoıyldy dep habarlama jibergen kúdikti 10 aıdan keıin ustaldy
Oqıǵa byltyr mamyr aıynda bolǵan. Oblystyq polıtsııa departamenti baspasóz qyzmetiniń jetekshisi Erbolat Sarqulovtyń habarlaýynsha, ol kezde óńirdegi pedagogıka, medıtsına salasyna baǵyttalǵan joǵary oqý oryndarymen qatar quqyqqorǵaýshylardy tárbıeleıtin ınstıtýttyń ǵımaratyna jarylǵysh zat qoıylǵany týraly habarlanǵan. Shuǵyl tekserý kezinde eshteńe tabylmady. Keıin kúdiktini izdestirý jumystary júrdi.
«Barlyq shuǵyl qyzmetter, saperler men kınologter qyzmettik ıtterin alyp oqıǵa ornyna bardy. Qyzmetkerler men stýdentter evakýatsııalandy. Jarylǵysh qurylǵylar tabylǵan joq. Oblys PD ekstremızmge qarsy is-qımyl basqarmasynyń qyzmetkerleri jedel is-sharalar barysynda Batys Qazaqstan oblysy mektepteriniń biriniń 10-synyp oqýshysyn anyqtap, polıtsııa bólimine jetkizdi. Oqýshy istegen isin moıyndady. Polıtseıler kompıýterdi tárkiledi. Quqyq qorǵaý organdarynda osyndaı qylmystardy anyqtaýǵa jáne ashýǵa arnalǵan jańa tehnıkalyq quraldarmen jabdyqtalǵan arnaıy bólimsheler bar. Aqtóbe oblysy Polıtsııa departamenti terrorızm aktisi týraly jalǵan habarlama jasaǵany úshin 5 jylǵa deıin bas bostandyǵynan aıyrý túrindegi qylmystyq jaýapkershilik kózdelgenin jáne bul qylmys aýyr qylmysqa jatatynyn eskertedi. Eger jalǵan terrorızm týraly habarlamany kámeletke tolmaǵan bala jiberse, onda ata-anasy jazalanady», - dedi Oblystyq polıtsııa departamenti baspasóz qyzmetiniń jetekshisi Erbolat Sarqulov.
Onyń aıtýynsha, arnaıy qyzmetterdiń jalǵan qońyraýǵa jumsaǵan shyǵyndary jasóspirimniń ata-anasynan óndiriledi.
Eske salsaq, 2021 jyldyń 1 qyrkúıegi kúni birneshe mektepke bomba qoıylǵany týraly habarlama tústi. Arada eki jylǵa jýyq ýaqyt ótkenimen, kúdikti áli anyqtalmady.
