Aqtóbedegi qańǵybastar úıinde turatyn sıqyrshy kópti tańǵaldyryp júr
Aqtóbedegi qańǵybastarǵa arnalǵan ortalyqtyń turǵyndary kún sanap artyp keledi. Aıaz kúsheıgen kúni shaqyrýlar kóp túsedi. Qarapaıym turǵyndar kóshede uıyqtap qalyp, nan surap júrgender týraly aqparat berip, ortalyq qyzmetkerleri mobıldi toppen tez jetedi. Al keıbiri ózderi izdep kelip, ortalyqty panalaıdy. Qazir munda 58 adam jatyr. Kóbi ishimdikke áýes, birneshe jyldan beri kóshe kezip, qańǵybas bolyp ketken. Al keıbiri qujattaryn jasatý úshin arnaıy mamandardyń kómegine júgindi. Qańǵybastar arasynda asa daryndy adamdar bar. Sıqyrshy Almas Ysqaqov - sonyń biri.
Meniń hobbıim - sıqyr kórsetý. Men 15 jasymnan bastap ıkemimdi bildim. Úıretip, kórsetip, syryn ashqan eshkim bolmady. Kitap oqyp, jýrnaldardy aqtaryp, sıqyr kórsetýdiń qyr-syryn meńgerip aldym. Tipti, Aqtóbege kelgen sıqyrshylardyń qoıylymdarynan qalmadym. Sıqyrdyń túri kóp. Ózim ıllıýzııalyq, matematıkalyq, epti qımyl arqyly kórsetiletin sıqyr túrlerin bilemin. Bul ónerde qolmen jumys isteı bilý mańyzdy», - dedi Almas Ysqaqov. Qarııa mektep bitirgen soń arnaıy bilim almaǵan. Aýylda mal baǵyp, qurylys jumystaryna aralasqan. Oblys ortalyǵyna Alǵa aýdany Toqmansaı aýylynan kelgen.
«Áıelim, bir qyzym bar. Qyzymnyń eki balasy bar. Olar Astana qalasynda turady. Telefon arqyly baılanysyp, habar alyp turamyn. Meni ózderine shaqyrdy. Qazir qujattarymdy túgeldep jatyrmyn. Qaıta jasaǵan soń balama barǵym keledi», - dedi ol.
Sıqyrshy kórermenin tańǵaldyratyn qoıylymdarynyń syryn aıtpaıdy. Sıqyrdy tabys kózine aınaldyrýdy da oılaǵan emes. Ol óz ortasynda, adamdardyń suraýymen, balalarǵa qyzyqty dúnıelerdi ǵana sahnalaıdy. Armany - jıenderin qýantyp, qyzyn baýryna basý.