Aqtóbedegi jeke balabaqshalarda birqatar kemshilik anyqtaldy
AQTÓBE. KAZINFORM – Aqtóbede memlekettik tapsyrysty oryndap otyrǵan jeke balabaqshalarǵa qoǵamdyq keńes monıtorıng júrgizdi. Olar tazalyq saqtalmaǵanyn, qaýipsizdik sharasy qabyldanbaǵanyn jáne tamaqtaný rejıminiń buzylǵanyn anyqtady.
Aqtóbe oblystyq qoǵamdyq keńes músheleri qaladaǵy 200-den astam balabaqshanyń jumysyn baqylap shyqty. Olar birqatar kemshilikti atap aıtty.
- Memlekettik balabaqshalarda barlyq talap oryndalady. Biraq úsh balabaqsha eski, qaýipti jaǵdaıda tur. Olar kúreli jóndeýdi qajet etedi. Taǵy bir aıta ketetinim, memlekettik-jekemenshik seriktestik jaqsy damyp keledi. Osy negizde ashylǵan balabaqshalarda tuz shahtasy, basseın de qarastyrylǵan. Degenmen kemshilikter de tirkeldi. Olardy úsh topqa bóldik. Birinshiden, ǵımarattardyń basym bóliginde talapqa saı emes, qaýipsizdik erejeleri saqtalmaǵan. Ekinshiden, tamaqtaný, gıgıenalyq, sanıtarııalyq-epıdemıologııalyq talaptar saqtalmaǵan. Úshinshiden, jas urpaqqa tárbıe berý kezinde kemshilikter anyqtaldy,- dedi Aqtóbe oblystyq qoǵamdyq keńes tóraǵasy Táttigúl Talaeva.
Onyń aıtýynsha, ár balaǵa 3 sharshy metr oryn qarastyrylýy kerek. Al jeke balabaqshalarda bul talap saqtalmaıdy. Balalar kireberiste kıinedi, tamaqtaný men oıyn alańy, jatyn orny bir. Sonymen birge keıbir balabaqshada evakýatsııa jospary ilinbegen.
- Muzdatqysh tar, balabaqshada tamaq saqtaý tártibi saqtalmaıdy. Dızınfektsııalyq zattary da joq keıbirinde. Dárýmen jýrnaly da bolýy kerek. Balalarǵa S vıtamıni berilmeıdi. Jumysshylary kir halatpen júr. Atyraýda ótken Ulttyq quryltaı kezinde balabaqshaǵa qoıylatyn talaptardy kúsheıtýdi suradym. Bul aldymen lıtsenzııalaý jumysy. Ekinshiden, monıtorıng jasap, balabaqshadaǵy pedagogterdiń biliktiligin arttyrý kerek. Jeke balabaqshada medbıke de joq. Oqys jaǵdaı bolma qalaı etpek? Olar tek kelip, ketedi. Monıtorıngten soń qujat prokýratýraǵa jiberildi, - dedi Táttigúl Talaeva.
Aıtyp óteıik, balalardy balabaqshamen qamtý úshin óńirde jyl saıyn 26 mlrd teńge bólinip otyr. Ákimdik endi baqylaý jumysyn prokýratýramen birlesip júrgizbek.
- Balalar bizdiń bolashaǵymyz dep aıtamyz. Al qyzmet kórsetý sapasy óte tómen. Osy salaǵa 26 mlrd teńge bólingen. Áleýmettik jelide shaǵym kóp. Sondyqtan kelisimshartty túgel qaıta qaraý kerek. Ár ata-ana beınebaqylaý kamerasy arqyly balasyn qarap otyrýy kerek. Medbıke týraly aıtqan másele de durys. Azyq-túlik, tamaqtandyrý máselesin de qarastyraıyq. Qazir biz kásipkerlerge senemiz, ata-ana bizge senedi. Sońy osyndaı bolyp tur. Men qoǵamdyq keńeske ózim aıtyp, monıtorıng júrgizildi. Bir aıtarym, aqsha durys jumsalýy tıis. Paıda tabýdy emes, sapaly qyzmetti basty orynǵa qoıýy kerek. Balalardan paıda tabam deý qate túsinik. Oblys prokýratýrasymen birge jumys isteımiz. Bári jaman emes, úlgili balabaqsha da bar,- dedi Aqtóbe oblysynyń ákimi Ashat Shaharov.
