Aqtóbedegi jappaı ýlanýdan keıin dúkenderde snekter satylmaıtyn boldy
ASTANA. KAZINFORM — QR DSM Sanıtarııalyq-epıdemıologııalyq baqylaý komıteti oqýshylardyń shyǵý tegi kúmándi snektermen jappaı ýlaný faktisi boıynsha osy ónimder satylatyn dúkenderge monıtorıng júrgizdi.
Monıtorıng barysynda 1,5 myńnan astam dúken qamtyldy. Keden odaǵynyń tehnıkalyq reglamentterin saqtaý turǵysynan zerthanalyq zertteýler úshin shyǵý tegi kúmándi ımporttyq ónimderdiń (snekter) 14 úlgisi satyp alyndy.
Zertteý nátıjeleri boıynsha osy ónimniń quramynda dám kúsheıtkishter (taǵamdyq qospalar) bar ekeni anyqtaldy: natrıı glýtamaty (E621), natrıı gýanılaty (E627), natrıı ınozınaty (E631), olardy óndiriste qoldaný Tehreglamentterdiń talaptarynda belgilenbegen.
SEBK atap ótkendeı, dámdi kúsheıtkishteri bar ónimderdi shamadan tys tutyný únemi artyq tamaqtanýdy ǵana emes, keıinnen semizdikke ákelip soqtyrady, sonymen qatar allergııa, as qorytý buzylystary, kúıdirgi týdyrýy múmkin.
Taǵamdardy tańbalaýda ónimniń ataýy, sandyq quramy, taǵamdyq jáne energetıkalyq qundylyǵy, daıyndalǵan kúni men jaramdylyq merzimi, saqtaý sharttary, daıyndaýshynyń, ımporttaýshy uıymnyń ornalasqan jeri, GMO bar ekendigi týraly aqparat joq. Sondaı-aq, ónimniń belgilengen qaýipsizdik talaptaryna sáıkestigin baǵalaýdy rastaıtyn sáıkestik týraly deklaratsııa joq.
— Atalǵan ónim boıynsha jedel den qoıý sharalary qabyldandy, ol satýdan alyndy. Kórsetilgen taǵamdardy satatyn saýda nysandaryna tehnıkalyq reglamentterdiń talaptaryna sáıkes tańbalanǵan sáıkestik týraly deklaratsııanyń mindetti túrde bolýymen tamaq ónimderin satýǵa qabyldaý jónindegi talaptardyń saqtalýy týraly habarlamalar jiberildi. Qazirgi ýaqytta osy ónimdi ákelýge jáne satýǵa tyıym salýdy qosa alǵanda, sanıtarııalyq-epıdemıologııalyq is-sharalar júrgizilýde. Sondaı-aq, aqparattyq-túsindirý jumystary júrgizilýde. Onyń sheńberinde qazaqstandyqtarǵa taýarlardy tekserilgen saýda oryndarynan satyp alý, qaptamanyń zatbelgisine, ónimniń tańbalanýyna nazar aýdarý usynylady. Onda ataýy, quramy, shyǵarylǵan kúni, jaramdylyq merzimi, saqtaý sharttary kórsetilýi tıis, ártúrli marketpleısterden kúmándi óndirilgen ımporttyq tamaq ónimderine tapsyrys berýden aýlaq bolý kerek. Óıtkeni bar sapa men qaýipsizdikti tıisti baqylaýdan ótpegen taýarlardy satyp alý qaýipti, — dep túsindirdi Sanıtarııalyq-epıdemıologııalyq baqylaý komıtetiniń mamandary.
Eske salsaq, 19 aqpanda Aqtóbe oblysy Qobda aýdanynda oqýshylardyń táttiden ýlanǵany málim boldy. Alǵashqy kúni aýrýhanaǵa 23 bala tústi. Bári bir synyptyń oqýshysy.
Qobylandy batyr atyndaǵy orta mekteptegi ýlaný dereginen soń aýrýhanaǵa bir emes, birneshe dáriger jiberilgen. Polıtsııa tergeý júrgizýge kiristi.
Keıinnen Aqtóbede epıdemıologter tekserý júrgizdi. Dúken ıesinde arnaıy qujaty bolmady, ónimde tehnıkalyq reglamentterge sáıkes tańbalary joq bolyp shyqty.
Degenmen epıdemıolog mamandar ónim quramynan aýyr metall men zııandy bakterııalar tappaǵany aıtyldy.