Aqtóbedegi úleskerler máselesi: ınvestordan bólek bıýdjetten de qarjy bólinedi
Aqtóbede 11 problemalyq nysan bar. Qazirgi kezde 540 úleskerdiń máselesin sheshý úshin qala ákimdigi janynan «Aqtóbe qurylys kompanııasy» JShS quryldy, dep habarlaıdy Kazinform.
Aqtóbe qalasy ákimdigi janynan qurylǵan «Aqtóbe qurylys kompanııasy» JShS-de barlyǵy 15 adam jumysqa qabyldanady. Olardyń kóbi zańger bolady. Sebebi úlesker isi sotta qaralyp, úkim men sheshim shyqqan soń qaıta qujat daıyndaýǵa týra keledi.
- Qazir Aqtóbe qalasy boıynsha 11 problemalyq nysan bar. Barlyǵy 540 úleskerdiń jalpy shyǵyny 3,5 mlrd teńge dep boljanyp otyr. Máseleni sheshý úshin «Elorda qurylys kompanııasynyń» tájirıbesine súıenip, «Aqtóbe qurylys kompanııasy» JShS quryldy. Basty másele – úleskerler problemasyn sheshý. Ol úshin bıýdjetten qarajat bólinedi, sonymen birge ınvestorlar tartylady, - dedi Aqtóbe qalasynyń ákimi Azamat Beket.
«Aqtóbe qurylys kompanııasy» JShS-i jumys isteýi úshin qylmystyq istiń úkimin, azamattyq istiń sheshimin kútedi. Sodan keıin belgili bir qurylys nysanyna tehnıkalyq tekserý jumysy júrgiziledi. Qurylys jumysyndaǵy aqaýlar bolsa, anyqtalyp, onyń joıý úshin jobalyq-smetalyq qujat qaıta jasalady. Osy kezde qurylysty aıaqtaýǵa qajetti qarjy eseptelip, aqsha qarastyrylady.
- Máselen 5 qabatty úıdiń birinshi qabaty ǵana salynǵan. Biraq barlyq páteri buǵan deıin satylyp ketken bolsa, ony 9 qabatty úı etip salý jolyn qarastyramyz. Keıin qalǵan 4 qabatyndaǵy páterdi satý shyǵyndy jabýǵa septigin tıgizedi. Sonymen birge ınvestorlar izdeımiz. Olarǵa qurylys aıaqtalsa, jer berýdi kózdep otyrmyz, - dedi Azamat Beket.
Aqtóbe oblysy ákimi baspasóz qyzmeti taratqan aqparatqa súıensek, Aqtóbedegi qurylysy aıaqtalmaǵan 11 problemalyq nysannyń beseýine qatysty tergeý aıaqtalyp, is sotqa joldandy. Sonymen qatar, 6 turǵyn úı kesheniniń qurylysyn ınvestorlar aıaqtaıdy.
- Qaladaǵy qurylys jumystaryna udaıy monıtorıng júrgizip otyramyz. Al problemalyq 11 nysan boıynsha sot sheshimin kútemiz. Sodan keıin ǵana jumysqa kirisemiz. Kompanııada 15 adam bolady. Negiznen zańgerler qabyldanady. Qaladaǵy problemalyq nysan qurylysy shamamen 2018-2019 jyldary bastalǵan, - dedi «Aqtóbe qurylys kompanııasy» JShS-niń dırektory Naǵymjan Aldııarov.
