Aqtóbedegi Elek ózeninde balyq qyryldy
AQTÓBE. KAZINFORM – Aqtóbe sý qoımasynan jiberilgen sýdyń aǵysy qatty bolyp, balyqqa zaqym keldi. Keıin ózende sý deńgeıi tómendep, balyq jaǵaǵa shyǵyp qaldy.
Aqtóbede Elek ózeninde balyqtyń qyrylǵany týraly aqparat tarady.
Tobyl-Torǵaı oblysaralyq basseındik balyq sharýashylyǵy ınspektsııasynyń mamandary oqıǵa ornyna baryp, tekserý júrgizdi.
- Búgin tekserý barysynda Aqtóbe sý qoımasynyń bógetinen tómen ornalasqan Elek ózeninde balyqtyń ólý deregin anyqtady. Sholý kezinde balyqtyń syrtqy dene jaraqattary anyqtaldy. Boljam boıynsha sý qoımasynan sý jiberilip, qatty aǵys kezinde bógetiń tómengi qurylysyna urylyp, soǵylǵan bolýy múmkin. Qazirgi ýaqytta sý qoımasynan sý jiberý toqtatylǵan. Nátıjesinde Elek ózenindegi sý deńgeıi tómendep, ólgen balyqtar jaǵalaýǵa shyǵyp qalǵan. Zerthanalyq zertteýler úshin sý men balyq synama alynyp, ólgen balyqtardy jınaý jumystary uıymdastyryldy. Naqty sebebi zerthanalyq qorytyndydan soń anyqtalady,- dep habarlady Torǵaı oblysaralyq basseındik balyq sharýashylyǵy ınspektsııasy.
Eske salsaq, sáýir aıynda Yrǵyz aýdany Aqótkel ózekshesinde balyq qyryldy. Ózeksheden 70 keli óli balyq jınaldy.