Aqtóbede zırattardy qıratqan balalardyń ata-analary shyǵyndy óteıdi
Aqtóbe oblystyq kámeletke tolmaǵandardyń isteri jónindegi mamandandyrylǵan aýdanaralyq sotynda zıratqa baryp, qulpytastardy syndyryp, búldirgen balalardyń ata-analary men talap qoıýshy bir kelisimge keldi. Aıyptalýshy tarap shyǵyndy óteıtin boldy, dep habarlaıdy Kazinform.
Temir aýdanynyń turǵyny Aqtóbe oblystyq kámeletke tolmaǵandardyń isteri jónindegi mamandandyrylǵan aýdanaralyq sotyna júginip, zıratty búldirgen balalardyń ata-analarynan materıaldyq jáne moraldyq zııandy óndirý týraly talap aryz túsirdi. Sottan ata-anasynyń beıitin búldirip, dálirek aıtqanda qulpytasyn syndyryp, jan-jaqqa shashyp tastaǵandardyń isin qaraýdy surady.
Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń baspasóz qyzmetiniń habarlaýynsha, buǵan deıin Temir aýdandyq soty kámeletke tolmaǵan balalardyń ata-analaryn ákimshilik jaýapqa tartty. Tórt ata-ananyń árqaısysyna 24 150 teńge aıyppul salyndy.
Eske salsaq, QR Azamattyq kodekstiń 925-babynyń 1-bóligine saı jasy on tórtke jetpegen kámeletke tolmaǵandar keltirgen zııany úshin onyń zańdy ókilderi jaýap beredi. Sodan keıin Aqtóbe oblystyq kámeletke tolmaǵandardyń isteri jónindegi mamandandyrylǵan aýdanaralyq sotyna júginip, qaıta qalpyna keltirý shyǵynyn óteý, zańgerdiń qyzmet aqysyn tóleý týraly talap aryz túsirdi.
– Daýdy medıtsııa tártibimen retteý týraly kelisim bekitildi. Balalardyń ata-analary talap koıýshynyń 572 700 teńgeni quraıtyn shyǵynyn 2023 jyldyń 31 jeltoqsanyna deıin óteýge mindetti. Sot uıǵarymy zańdy kúshine engen joq, – dep habarlady Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń baspasóz qyzmeti.
