Aqtóbede joq malǵa sýbsıdııa aldy degen kúdikke ilikken eks-depýtat isi sotta qarala bastady
Aqtóbe qalalyq sotynda 457 mln teńge shyǵyn keltirdi degen kúdikke iligip, joq malǵa sýbsıdııa aldy dep aıyptalyp jatqan eks-depýtat isi qarala bastady, dep habarlaıdy Kazinform.
Aqtóbelik eks-depýtat bıyl mamyr aıynda ustaldy. Oǵan Qylmystyq kodekstiń «Alaıaqtyq» baby boıynsha aıyp taǵyldy. Іs materıalyna súıensek, sharýa qojalyǵy atynan jem-shópke sýbsıdııa alýǵa ótinish bergen. Al shyn máninde ol kórsetken mal múlde bolmaǵan. Sondaı-aq «Sybaǵa» memlekettik baǵdarlamasy boıynsha «Agrarlyq nesıe korporatsııasy» AQ-y arqyly 600 bas iri qara mal satyp alýǵa bergen nesıe qarajatyn zańsyz alǵan.
«N. «Qobda Agro» sharýa qojalyǵynyń basqarý úshin ıesin kóndirip, notarıýs arqyly senimhat ıelenedi. Keıin qojalyq tóraǵasy bola tura 1200 bas asyl tuqymdy múıizdi iri qara alý úshin «Sybaǵa» baǵdarlamasyna ótinish jazady. Shyn máninde ol mal alýdy josparlamaǵan. Qujat rásimdeý kezinde N. «GerefordOrganık» jaýapkershiligi shekteýli qoǵamymen aradaǵy kelisimshart, sonymen birge mal ustaıtyn birneshe baza men jer telimi jáne satyp alatyn 1200 MІR kepilge qoıady. Sonymen birge 46,3 mln teńge bolatyn óziniń 275 bas múıizdi iri qarasynyń qujatyn usynady. 41,1 mln teńge bolatyn 163 bas qazaqtyń aqbas sıyry, quny 120 mln teńge bolatyn 500 bas abendın-angýs tuqyrdy iri qaranyń qujatyn beredi. Biraq qujattary jalǵan. «Qobda Agro» ShQ-da mundaı iri qara bolmady. Sóıtip N. kepilge qoıatyn múlik týraly jalǵan aqparat bergen. «Agrarlyq nesıe korporatsııasy» AQ-y 780 mln teńge ótinishin qanaǵattandyrady. 2021 jyly 11 qazanda qaryz alýshyǵa nesıeniń 50% berildi. Barlyǵy 390 mln teńge bólindi. 2021 jyldyń 28 jeltoqsany kúni 390 mln teńge «Qobda Agro» ShQ esepshotyna túsedi. 2021 jyldyń 30 jeltoqsany kúni N. aqshany «Talan» ShQ esepshotyna, sonymen birge ózine tıesili «Qobda Beef» sharýa qojalyǵynyń esepshotyna aýdaryp, ıemdenedi. Ol elektrondy qoltańbany paıdalanyp, jem-shópke sýbsıdııa alýǵa ótinish beredi. Aqtóbe oblystyq Aýyl sharýashylyǵy basqarmasyna jalpy somasy 67,2 mln teńge shyǵyn keltirdi»,- dedi memlekettik aıyptaýshy Asel Esetova.
Aıta keteıik, eks-depýtat mamyr aıynan beri qamaýda otyr. Ol sotta ózine taǵylǵan aıyppen kelispedi. Sot otyrysy keler jyly jalǵasady.
