Aqtóbede jerdi munaımen lastaǵan kompanııaǵa aıyppul salyndy

AQTÓBE. QazAqparat – Aqtóbedegi iri munaı kompanııasynda qubyrdan munaı aǵyp ketip, jerdi lastady. Ekologtar synama alyp, tekserý júrgizgen soń aıyppul saldy, dep habarlaıdy QazAqparat tilshisi.

Aqtóbe oblysynda munaı uńǵymasynan beımálim suıyqtyq aǵyp, aınalany lastaǵan.

Oblystyń ekologııa departamenti «SNPS Aqtóbemunaıgaz» AQ qarasty «Keńqııaqmunaı» KMGDB №797 uńǵymasyn tekserdi.

«Apattyq oqıǵa №797 uńǵyma baǵanyn dánekerleeý kezinde boldy. Saldarynan uńǵymadan atqylaǵan munaı aralas lastanǵan sý 3168 sharshy metrge jaıyldy. Tekseris barysynda topyraq synamalary alynyp, nátıjesinde jerdi munaı lastanǵany anyqtaldy. QR Ekologııalyq zańnamasy talaptaryn buzǵany úshin «SNPS-Aqtóbemunaıgaz» AQ-y QR ÁQBtK 337-babynyń tórtinshi bóligi negizinde 3 063 000 teńge kóleminde ákimshilik jaýapqa tartyldy. Sonymen qatar apattyq jaǵdaı týraly ýákiletti organǵa der kezinde habarlamaǵany úshin QR ÁQBtK 327-1-babynyń birinshi tarmaǵyna sáıkes 200 AEK quraıtyn ákimshilik jaýapqa tartyldy», - dep habarlady oblystyq ekologııa departamenti.

Sonymen qatar, QR Ekologııalyq kodeksiniń talaptaryna sáıkes qorshaǵan ortaǵa keltirilgen ekologııalyq zalaldy joıý týraly remedıatsııa baǵdarlamasyn jasaý týraly nusqama berildi.

Foto: epravda.com.ua