Aqtóbede «Jaıly mekteptiń» sany qysqardy
AQTÓBE. KAZINFORM – Aqtóbe oblysynda 18 «Jaıly mekteptiń» tek 14-i salynyp jatyr. Tórteýi qysqaryp qaldy.
Aqtóbede barlyǵy 14 «Jaıly mektep» salynady. Onyń ekeýinde qurylys aıaqtaldy.
- Aqtóbe oblysy boıynsha 2023-2025 jyldarǵa 14 «Jaıly mektep» qurylysy josparlandy. Bul úsh aýysymdy jáne apatty mektepter problemasyn sheshýge baǵyttalǵan ulttyq joba. Onyń qýattylyǵy – 11 400 oryn. 14 mekteptiń ekeýinde byltyr qurylys aıaqtaldy. Olar: Aqtóbe qalasy Eset batyr turǵyn alaby úshinshi shaǵyn aýdanyndaǵy 2 000 oryndyq mektep jáne Aqjar-2 turǵyn alabyndaǵy 300 oryndyq mektep. Bıyl ózge mekteptiń qurylysy aıaqtalady. Aqtóbe qalasy Ońtústik-batys aýdanyndaǵy 300 oryndyq mektep jyl sońyna deıin, ózgeleri jańa oqý jylyna deıin beriledi. Barlyǵyna 80 mlrd teńge jumsalady. Úsh jyldyq jospardyń jumysy, - dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Eske salsaq, áý basta Aqtóbe oblysynda 18 «Jaıly mekteptiń» qurylysyn júrgizý jobasy bekitildi. Byltyr onyń 14-i qoldanysqa berilýi tıis edi.
Alaıda qazir tek 2 mekteptiń qurylysy aıaqtalyp tur. Onyń ózinde sabaq bolyp jatqan joq.
- Qazirgi kezde oqýshylardyń qujatyn qabyldaý jumysy júrip jatyr. Naqty qaı ýaqytta ashylatyny aldaǵy ýaqytta belgili bolady, - dedi Aqtóbe oblystyq bilim basqarmasynyń baspasóz qyzmeti.
Aıta keteıik, Aqtóbede 4 mektep qurylysy qysqartyldy. Olar - Aqtóbe qalasy Sarbaz, Batys-3, Qyzyljar-3 turǵyn alaptary men Shalqar aýdany Bozoı aýylyndaǵy mektep.
- Qarjy tapshylyǵyna baılanysty tórt mektep qysqartyldy. Onyń ishinde Bozoıdaǵy mektep tizimnen shyǵaryldy. Ol jerge mektep jergilikti bıýdjeti esebinen salynady. Joba jasalyp jatyr, qurylys bıyl bastalady, - dedi Aslan Jarasbaev.
Buǵan deıin habarlaǵanymyzdaı, Bozoı aýylyndaǵy mektep apatty jaǵdaıda dep tanylǵan.