Aqtóbede jastarǵa arnalǵan telehıkaıa túsirilip jatyr
Barlyǵy 10 bólimnen turatyn serıaldyń alǵashqy maýsymy oqý jylynyń sońynda daıyn bolady. Ideıa avtory - Azamat Aınaǵulov, rejısseri - Marat Teleýov, al stsenarıı avtory - Órken Muqaqov.
«Jastarǵa arnalǵan telehıkaıa qazaq tilinde túsirilip jatyr. 15-45 jas aralyǵyndaǵy kórermen úshin qyzyqty bolady. Kastıngke 180 adam qatysyp, 8 basty róldi somdaıtyn ártis tańdaldy. Olardyń arasynda stýdentter men ázilkeshter bar. Negizgi oqıǵa jataqhanada órbıdi. Aýyl men qala jastary, kórshiles Reseıden kelgen stýdentterdiń qarym-qatynasy, dastyq pen satqyndyq, mahabbat pen adaldyq, qazirgi jastardyń ómiri sýretteledi. «Aqtóbeniń jastary osyndaı» dep kórsetemiz», - dedi «Qazaqstan» RTRK» Aq AO fılıalynyń dırektory, telehıkaıa prodıýsseri Ernur Býrahan.
Al rejısser Marat Teleýov týyndy ózgelerge uqsamaıtyn bolady dep sendirip otyr. 
«Biz respýblıkaǵa kórsetýge bolatyn týyndy daıyndaýymyz kerek. «Aqtóbede jasalǵan» degen talapqa tolyq saı keledi. Túsirilim alańyndaǵy jastar da baryn salyp jatyr. Jastar jyly bolǵan soń ınvestorlardy qoldaýǵa shaqyramyn. Bul qarjylyq, sonymen qatar qandaı da bir ǵımaratty jalǵa berý sekildi kómek bolýy múmkin», - dedi ol.
Telehıkaıanyń bıýdjeti kommertsııalyq qupııa kúıinde saqtalyp otyr. Al telehıkaıa túsiriletin eki bólmeni arna qyzmetkerleri óz kúshimen jasady.
«Telehıkaıa arnanyń jertólesinde túsirilip jatyr. Bólmege qajetti zattardyń bárin telearna qyzmetkerleri óz úıinen tasydy. Biri perde, ekinshisi tusqaǵaz ákeldi. Dızaıner de shaqyrylmady», - dedi E.Býrahan.
Aıta keteıik, ázirge telehıkaıaǵa «Welcome to Aqtobe» dep ataý berildi. Biraq kıno túsirýshiler ataý berýde utqyr usynystardy qabyldaýǵa ázir.
«Áleýmettik jeli arqyly habarlama bergen kezde kastıngke jastar kóp jınaldy. Sonymen qatar, «H keıipker» bolady. Bul saıasatta, ónerde, bızneste júrgen belgili adamdar bolýy yqtımal», - dedi ıdeıa avtory Azamat Aınaǵulov. Aldaǵy ýaqytta demeýshiler tabylsa, telehıkaıanyń birneshe maýsymy túsiriledi. Alǵashqy maýsymy 10 bólimnen turady.
