Aqtóbede jabylǵan ýnıversıtet stýdentteri ózge joǵary oqý oryndaryna aýysyp jatyr
AQTÓBE. KAZINFORM — Qazaq-orys halyqaralyq ýnıversıteti ákimshilik jaýapqa tartylǵan, lıtsenzııasynan aıyryldy. Stýdentter ózge joǵary oqý oryndaryna aýysqan kezde de UBT qorytyndysyn talap etiledi.
Bıyl kóktemde Qazaq-orys halyqaralyq ýnıversıtetiniń jabylatyny belgili boldy. Ata-analardyń shaǵymynan soń Ǵylym jáne joǵary bilim mınıstrligi jospardan tys tekserý júrgizgen. Tekserý kezinde JOO-ǵa qoıylatyn 22 tarmaqtyń saqtalmaǵany anyqtaldy. Onyń ishinde:
— biliktilik talaptaryna sáıkes kelmeýi;
— joǵary jáne joǵary oqý ornynan keıingi bilim berý uıymdary qyzmetiniń úlgilik erejelerin buzylýy;
— oqýǵa qabyldaý erejesin saqtamaýy;
— memlekettik jalpyǵa mindetti bilim berý standarttary talaptaryna sáıkes kelmeýi tirkeldi.
— Tekserý qorytyndysy boıynsha ýnıversıtet ákimshilik jaýapqa tartyldy. Ǵylym jáne joǵary bilim mınıstrliginiń 2025 jylǵy 20 maýsymdaǵy № 940 buıryǵy negizinde Qazaq-orys halyqaralyq ýnıversıteti bilim berý qyzmetin júrgizý quqyǵyna berilgen lıtsenzııa jáne lıtsenzııaǵa qosymshalarynan aıyryldy. Bilim alýshylardy basqa joǵary oqý oryndaryna aýystyrý máselesi boıynsha qurylǵan jumys toby 26 mamyr men 5 maýsym aralyǵynda Aqtóbe qalasynda keshendi jumys júrgizdi. 6 joǵary oqý ornynyń ókilderinen quralǵan jumys toby (onyń ishinde Atyraý, Oral, Aqtóbe qalalarynyń JOO-y), Aqtóbe oblysy ákimdiginiń qyzmetkerlerimen birlesip, Qazaq-orys halyqaralyq ýnıversıtetiniń stýdentteri jáne ata-analaryna kezdesý ótkizdi. Basqa joǵary oqý oryndaryna aýysý, akademııalyq aıyrmashylyqty tapsyrý, oqý aqysyn tóleý, jataqhanadan oryn berý tártibi jáne t. b. suraqtarǵa jaýap berip, túsindirý jumysyn júrgizdi, — dep jaýap berdi Ǵylym jáne joǵary bilim mınıstrligi Kazinform agenttiginiń saýalyna.
Túsindirý jumystarynan soń 1100-ge jýyq stýdenttiń qujattary ózge joǵary oqý oryndaryna aýystyrýǵa daıyndalǵan. Mınıstrlik aqparatyna súıensek, olar Q.Jubanov atyndaǵy Aqtóbe óńirlik ýnıversıteti, Baıshev ýnıversıteti, M.Ótemisov atyndaǵy Batys Qazaqstan ýnıversıteti, Batys Qazaqstan ınnovatsııalyq-tehnologııalyq ýnıversıteti, H.Dosmuhamedov atyndaǵy Atyraý ýnıversıteti men Safı Ótebaev atyndaǵy Atyraý munaı jáne gaz ýnıversıtetinde oqýyn jalǵastyra alady. Tipti Qazaqstannyń kez kelgen JOO-na aýysý quqyǵyn da bar. Birqatar stýdent oqýyn basqa qalalardaǵy joǵary oqý oryndarynda (Almaty gýmanıtarly-ekonomıkalyq ýnıversıteti, Qonaev ýnıversıteti, Mıras ýnıversıteti, Turan-Astana ýnıversıteti, Kaspıı ýnıversıteti, Jáńgirhan ýnıversıteti, Q-ýnıversıteti, Bóketov ýnıversıteti, Dýlatov atyndaǵy Qostanaı ýnıversıteti, Orynbor memlekettik ýnıversıteti, Qazaqstan-Amerıka erkin ýnıversıteti jáne t. b. — mınıstrlik) jalǵastyrýǵa sheshim qabyldap, qujattaryn alǵan. Olar 9 bakalavrıat mamandyqtary, ıaǵnı, Bıznes jáne basqarý, Tilder jáne ádebıet, Sáýlet jáne qurylys, Qyzmet kórsetý salasy, Gıgıena jáne óndiriste eńbekti qorǵaý, Áleýmettik ǵylymdar, Quqyq, Aqparattyq-kommýnıkatsııalyq tehnologııalar, Mektepke deıingi tárbıeleý jáne oqytý pedagogıkasy, Pándik mamandandyrylmaǵan muǵalimderdi daıarlaý boıynsha oqyn jalǵastyra alady. Magıstratýra men doktorantýrada Áleýmettik ǵylymdar, Bıznes jáne basqarý mamandyqtary bar.
— Bilim alýshynyń akademııalyq buzýshylyqtary bolmaǵan jaǵdaıda oqý jylyn saqtaı alady. Oqýǵa qabyldaýdyń úlgilik qaǵıdalaryna sáıkes ulttyq biryńǵaı testileý (UBT) sertıfıkaty talap etiledi. UBT sertıfıkaty «Pedagogıkalyq ǵylymdar» bilim berý salasy, «Quqyq» daıarlaý baǵyty boıynsha keminde 75 ball, qalǵan baǵyttary boıynsha keminde 50 ball jınaǵan bilim alýshylar jiberiledi. Qabyldaý erejelerine sáıkes 25 tamyzǵa deıin jańa oqý jylyna oqýǵa qabyldaý týraly buıryqtar bekitiledi. Búgingi kúnde aýysatyn bilim alýshylardyń qujattary qabyldanyp, jataqhanamen qamtamasyz etý sııaqty basqa máseleleri qarastyrylyp jatyr. Sonymen birge muraǵat qujattaryn memlekettik muraǵatqa tapsyrý, onyń ishinde buryn bitirgen stýdentterdiń málimetteri boıynsha mindettemelerdiń oryndalýyn qamtamasyz etý maqsatynda tıisti sharalar qabyldandy. Bilim alýshylarǵa qatysty muraǵat qujattary, sonyń ishinde buryn oqýdy bitirgen tulǵalar týraly derekterdiń memlekettik arhıvke tapsyrylýy týraly mindetterdiń oryndalýyn úılestirý maqsatynda jumys jasaldy. Atap aıtqanda oblystyq muraǵat bóliminiń mamandary kezdesý ótkizip, «Bilim týraly» zańnyń 42-baby boıynsha quryltaıshynyń 2 aı ishinde barlyq qujaty arhıvke tapsyrý mindeti ekeni eskertildi, — dep habarlady Ǵylym jáne joǵary bilim mınıstrligi.
Aıta keteıik, naýryz aıynda Qazaq-orys halyqaralyq ýnıversıtetiniń 350 stýdenti oqýdan shyǵaryldy. Ýnıversıtet rektorynyń 350 stýdentti oqýdan shyǵarý týraly buıryǵy zańsyz bolyp shyqty. Keıin Aqtóbedegi Qazaq-orys ýnıversıteti bıylǵy oqý jylynan soń jabylatyny belgili boldy.