Aqtóbede zeınetker bar jıǵan-tergenin beıtanys adamǵa aýdaryp jibergen

AQTÓBE. QazAqparat - Aqtóbede 8 8000800059 telefon nómirine habarlasyp, aldanyp qalǵandar polıtsııadan kómek surap jatyr, dep habarlaıdy QazAqparat tilshisi.

Alaıaqtar bank klıentterine «banktiń qaýipsizdik qyzmeti» nemese «qarjy monıtorıngi qyzmeti» dep qońyraý shalyp, karta arqyly kúdikti operatsııa jasalǵanyn habarlaıdy.

Senimdi bolýy úshin olar bankterdiń jáne basqa qurylymdardyń aýyspaly nómirlerinen qońyraý shala alady.

Ári qaraı da alaıaqtyq shemasy bar.

Aqtóbe oblysy polıtsııa departamentiniń bastyǵy Abaı Júsipovtiń aıtýynsha, alaıaqtar ózin shynymen bank qyzmetkeri retinde tanystyryp, senimdi bolý úshin ol klıentke 8 8000800059 telefon nómirin tere alatyndyǵyn aıtady.

Osydan keıin jábirlenýshi kórsetilgen nómirge qońyraý shalyp, onda operatordyń daýysyn estip, ony bank qyzmetkerimen baılanystyrdy.

«Málimettiń ras-ótirigin teksergennen keıin jábirlenýshiler alaıaqtarǵa aqsha aýdarady. 88000800059 nómiri alaıaqtarǵa tıesili ekenin habarlaımyz. Mysaly 67 jastaǵy zeınetkerdiń uıaly telefonyna belgisiz adam qońyraý shaldy. Kúdikti ózin bank qyzmetkeri retinde tanystyryp, belgisiz adamdardyń onyń shotynan aqsha almaq bolǵanyn aıtady. Keıin kartochkasynan 2 250 000 teńge somasynda aqshany ózine aýdaryp alǵan»,- dep habarlady oblystyq PD baspasóz qyzmetiniń jetekshisi Erbolat Sarqulov.