Aqtóbede túrli deńgeıdegi máslıhattardyń 10 depýtaty saılanady

AQTÓBE. KAZINFORM — Búgin úmitkerlerdi usyný bastaldy. Saılaý 26-qazan kúni bolady.

QR «Saılaý týraly» Zańyna sáıkes jyl saıyn naýryz jáne qazan aılarynyń sońǵy jeksenbisinde shyǵyp qalǵan depýtattardyń ornyn tolyqtyrý úshin saılaý ótedi. Aqtóbede túrli deńgeıdegi máslıhattyń 10 depýtatynyń orny bos tur.

— Aqtóbe qalalyq máslıhatynyń eki depýtaty jáne 6 aýdanda 8 depýtattyń orny bar. Olar Qarǵaly aýdanynan 1, Yrǵyzdan 1, Baıǵanınnen 1, Shalqar men Hromtaýdan 2 depýtat jáne Oıylda 1 depýtat orny. Kandıdattardy usyný búgin bastalyp, 25-qyrkúıek saǵat 18:00–ge deıin jalǵasady. Tirkeý 30-qyrkúıek kúni saǵat 18:00–de aıaqtalady. Sodan keıin 25-qazan saǵat 00:00–ge deıin úgit-nasıhat júrgiziledi. Saılaýdy ótkizýge 7 aýmaqtyq, 10 okrýgtik jáne 31 ýchaskelik saılaý komıssııasy jumyldyrylady, — dedi Aqtóbe oblystyq saılaý komıssııasynyń hatshysy Asyljan Búrkitalın. Onyń aıtýynsha, depýtattardyń biri kóship ketse, ekinshisi memleketke qyzmetke ornalasqan.

Sondaı-aq 5-qazan kúni Áıteke bı aýdany Jabasaq aýyldyq okrýginde ákim saılaýy ótedi. Aýyldyq okrýg ákimine kandıdattar usyný 28-tamyzda bastalady.

Aıta keteıik, shildede Aqtóbede 19 aýyldyq okrýg jáne bir aýyl ákimi saılandy.