Aqtóbede turǵyn úı jaldaý aqysy tómendetildi

ASTANA. KAZINFORM — Aqtóbe oblysynyń Oıyl aýdanynda memlekettik turǵyn úı qorynan jaldamaly baspana alǵandar 1 sharshy metrge 141,3 teńge tólep kelgen, dep habarlaıdy oblystyq prokýratýra baspasóz qyzmeti.

«Zań jáne Tártip» ıdeologııasyn iske asyrý aıasynda Aqtóbe oblysy prokýratýrasy memlekettik turǵyn úı qoryndaǵy jaldamaly turǵyn úıdi paıdalaný kezinde azamattardyń quqyqtarynyń saqtalýyn taldady. Nátıjesinde 145 turǵyn úı boıynsha jaldaý aqysynyń 50%-ǵa negizsiz qymbattaǵany anyqtaldy.

— Atap aıtqanda, Oıyl aýdany ákimdiginiń qaýlysymen 1 sharshy metrge 141,3 teńge mólsherinde tólem belgilengen. Alaıda esepteýler bekitilgen ádistemege sáıkes júrgizilmegen, óıtkeni naqty soma 1 sharshy metr úshin 70,65 teńgeni quraýy tıis. Prokýrorlyq qadaǵalaý aktisi negizinde ákimdiktiń qaýlysy joıylyp, turǵyn úıdiń jaldaý aqysy 8 733 teńgeden 4 367 teńgege deıin tómendetildi. Sonymen qatar, 70 azamat úshin qaıta esepteý júrgizilip, qazirgi ýaqytta 3,1 mln teńge 2025 jylǵy jaldaý aqysyna esepteldi. Sondaı-aq, jaldaý aqysyn ishinara tólegen 75 azamattyń qaryzy 3,3 mln teńgeden 2,5 mln teńgege azaıtyldy, — delingen habarlamada.

Prokýrorlyq qadaǵalaý aktisi negizinde 145 azamattyń quqyqtary qalpyna keltirilip, normatıvtik quqyqtyq akt zańnamaǵa sáıkestendirildi, al jaýapty tulǵalar tártiptik jaýapkershilikke tartyldy. Azamattardyń konstıtýtsııalyq quqyqtaryn qorǵaý boıynsha jumys jalǵasady.