Aqtóbede tórt aýdannyń prokýrory taǵaıyndaldy
AQTÓBE. KAZINFORM – Baıǵanın, Yrǵyz, Áıteke bı jáne Oıyl aýdandarynda prokýrorlar aýysty. Bárinde taǵaıyndaý bir kúnde ótti.
Aqtóbe oblysy prokýrorynyń orynbasary Aıbek Taǵybergen Oıyl aýdanyna jumys saparymen bardy. Onda aýdan prokýrory Raýan Tobyqovty tanystyrdy.
2023 jyldyń mamyr aıynan bastap Oıyl aýdanynda prokýror bolǵan Aqedil Úsenov QR Bas prokýrorynyń buıryǵymen Áıteke bı aýdanynyń prokýrory qyzmetine taǵaıyndaldy.
Aýdan ákimdiginiń habarlaýynsha, Aqedil Úsenov Aqtóbe oblysy Shalqar aýdanynyń týmasy. Ol eńbek jolyn Mártók aýdany prokýrorynyń kómekshisi, aǵa kómekshisi bolyp bastady. Aqtóbe oblystyq prokýratýrasynda, Baıǵanın aýdandyq prokýratýrasynda jumys istedi.
Baıǵanın aýdany prokýrory qyzmetine Erlan Bahytov taǵaıyndaldy. Ol eńbek jolyn 2002 jyly bastady. Aqtóbe, Jambyl jáne Atyraý oblystarynda eńbek etti. 2023 jyldan bastap búginge deıin Áıteke bı aýdanynyń prokýrory bolyp, Baıǵanın aýdanyna aýystyryldy.
Aqtóbe oblysy prokýrorynyń orynbasary Talǵat Álibaev Yrǵyzǵa jumys saparymen baryp, aýdan aktıvine Bekzat Tórehanovty tanystyrdy. Mańǵystaý, Qyzylorda oblystary men Astana qalasynda eńbek etti. Bıyl ǵana QR Bas prokýratýrasynyń basqarmasynda prokýrordyń kómekshisi boldy.
Buǵan deıin Aqtóbe qalasynda jáne aýdandarda 12 sýdıa qyzmetke kiristi. Al oblystyq sot tóraǵasy basqa qyzmetke aýysty.