Aqtóbede taqyrǵa aınalǵan jaıylymǵa erkekshóp pen jońyshqa egiledi
AQTÓBE. KAZINFORM - Aqtóbeniń eki aýdanynda taqyrǵa aınalǵan jaıylymǵa erkekshóp pen jońyshqa egiledi. Al olardyń jaqsy shyǵýy úshin úıeńki, jıde, qaraǵash, qaraǵan kósheti otyrǵyzylady.
Aqtóbede «Qazaqstandaǵy jaıylymdyq jerlerdiń klımattyq turaqtylyǵyn agromelıoratsııalaý» jobasy aıasynda jumys bastaldy. Áıteke bı aýdanynyń Araltoǵaı jáne Muǵaljar aýdanynyń Taldysaı aýyl okrýgteri tańdaldy. Eki aýylǵa Qazaq mal sharýashylyǵy jáne jemshóp óndirisi ǵylymı-zertteý ınstıtýtynyń ǵalymdary bardy. Aýmaǵy 2500 gektar bolatyn jaıylymdy qalpyna keltirý úshin 550 ga jerge agro orman júıesi qoldanylady. Qazirgi kezde pılottyq jobaǵa kelisken fermer men sharýa qojalyqtary tańdaldy.
Talap boıynsha jer paıdalanýshylar jergilikti topyraq jáne tabıǵatqa beıimdelgen erkekshóp pen túıejońyshqa egedi. Al shyǵym jaqsy bolýy úshin úıeńki, jıde, qaraǵash, qaraǵan sııaqty aǵashtardyń kósheti otyrǵyzylady. Olarǵa kóshet pen ekpeshóp tuqymy tegin beriledi. Sharýalar tehnıka men jumys kúshin ózderi uıymdastyrady.
- Jobany Qazaqstannyń ekologııalyq uıymdarynyń qaýymdastyǵy men BUU-nyń Azyq-túlik jáne aýyl sharýashylyǵy uıymy birlesip qolǵa aldy. Jer ıeleri joba sarapshylary usynǵan tehnologııa talaptaryn sapaly jáne der kezinde oryndaýy tıis. Tozǵan jaıylymdaǵy agro orman júıesi jaýyn men qar sýynyń topyraqqa sińýine múmkindik beredi, tasqyn qaýpin azaıtady. Aptap ystyqta malǵa kóleńke, al qystyń qytymyr aıazynda yqtasyn bolady. Joba sarapshylary «Jaıylymdar týraly» Zańynyń talaptaryna sáıkes aýyldyq okrýgterge 5 jyldyq jospar daıyndady. Bilim berý baǵdarlamalaryn ázirleý, mamandar daıarlaý jáne fermerler úshin arnaıy trenıngter ótkizý máseleleri de qarastyrylǵan. Sonymen birge Jaıylym paıdalanýshylardyń qoǵamdyq keńesi quryldy. Onyń quramyna jergilikti atqarýshy bılik, ardagerler, áıelder jáne jastar uıymdarynyń ókilderi, bilikti mamandar men fermerler kirdi, - dep habarlady Qazaqstannyń ekologııalyq uıymdarynyń qaýymdastyǵy.
Qazaqstannyń ekologııalyq uıymdarynyń qaýymdastyǵy men Sh.Bersıev atyndaǵy Aqtóbe joǵary agrarlyq tehnıkalyq kolledji dalalyq jaıylym mektebin uıymdastyrýdyń naqty qadamdary belgilengen memorandýmǵa qol qoıdy.
Eske salsaq, elimizde 30 mln gektar jaıylym tabıǵat áserinen, al 27 mln gektar jer mal taptaǵannan jaramsyz kúıge tústi. Buǵan deıin Kazinform jerlerdi qalpyna keltirýge arnalǵan pılottyq jobanyń qalaı bastalyp, qandaı jumys atqarylyp jatqanyn anyqtap bildi.