Aqtóbede suıytylǵan gaz áli de tapshy

AQTÓBE. KAZINFORM – Aqtóbe oblysynda suıytylǵan gaz áli de tapshy. Jergilikti ákimdik muny iri munaı kompanııalaryndaǵy jóndeý jumysymen jáne óńirge bólingen gaz kóleminiń suranysqa saı kelmeýimen baılanystyryp otyr.

Aqtóbe oblysynda jaz boıy suıytylǵan gaz tapshy boldy. Júrgizýshiler saǵattap kezekke turyp, keıbiri talon izdep ketti. Bul másele kúz kelgende de tolyq sheshimin tappady. Oblystyq ákimdik onyń eki sebebin atady.

- QR Energetıka mınıstrligi qyrkúıek aıynda suıytylǵan gazdy berý kólemin ulǵaıtýǵa ýáde etti. Biraq ol bólinbedi. Qazan aıyna dep josparlaǵanda «SNPS-Aqtóbemunaıgaz» AQ-ynda gaz óńdeıtin bir apparaty synyp qalyp, óndiris kólemi sál tómendep qaldy. Bul kompanııa aı saıyn 6 myń tonna beretin edi. Osy aıda 800 tonnaǵa kemitti. Sonymen birge Atyraý munaı óńdeý zaýytynan da gaz keletin edi. Munda josparly jóndeý jumysy júrgizildi. Bul zaýyt 24-25 kúnderi jumysyn bastaıdy. Sol kezde ǵana bizge qosymsha gaz bólinedi, - dedi Aqtóbe oblysy kásipkerlik basqarmasynyń basshysy Almas Salyqbaev.

Onyń aıtýynsha, qazan aıynda Aqtóbege 13 000 tonna gaz bólinýi tıis edi. Alaıda tek 11 388 tonnasy ǵana beriletin boldy. Qazir 2800 tonnasy qalyp tur. Sol sebepti ár kúnge tek 280 tonnasy shyǵarylyp, satylady.

- Qarasha aıynda 13000 tonna gaz bólinedi. Sondyqtan kelesi aıda mundaı problema bolmaıdy dep oılaımyz. Bizde 58 myńnan astam kólik gazben júredi. Oǵan tranzıttik kólikter men tirkeýge alynbaǵan grýzındik, reseılik kólikterdi de qosý kerek. Sonda suranys joǵary, - dedi Almas Salyqbaev.

Eske salsaq, Aqtóbede shilde aıynan bastap gaz quıý beketteninde uzynsonar kezek paıda boldy.