Aqtóbede sý tasqynynan zardap shekkenderge 64 mln teńge áleýmettik tólem berildi

ASTANA. KAZINFORM – Aqtóbede sý tasqynynan kelgen materıaldyq shyǵyndardy esepteý bastaldy. Bul týraly oblys ákiminiń orynbasary Asylbek Esenbaev aıtyp berdi.

«Sý tasqyny saldarynan ómirlik qıyn jaǵdaıǵa tap bolǵan otbasylardan búgingi kúni 206 adamǵa 64 mln teńge kóleminde birjolǵy áleýmettik tólem júrgizildi. Bul baǵyttaǵy jumys jalǵasyn tabýda», - dedi A, Esenbaev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, sý tasqyny saldarynan oblysta 1087 turǵyn úı, 47 ǵımarat pen qurylystar, 232 aýla jáne 852 saıajaı úıleri zaqymdanǵan.

«Sý tasqynynan kelgen materıaldyq shyǵyndardy esepteý maqsatynda ár aýdannyń jeke komıssııasy qurylyp, 2652 ótinish qabyldanyp, baǵalaý jumystary júrgizilýde. Memleket basshysynyń tapsyrmasyna sáıkes, zardap shekken barlyq turǵynnyń shyǵyndary óteledi», - dedi spıker.

Sondaı-aq, zardap shekkenderge gýmanıtarlyq kómek jınaýǵa 2 pýnkt qurylyp, barlyǵy 300 tonnaǵa jýyq taýar jınaldy. Onyń 215 tonnasy muqtaj turǵyndarǵa taratyldy. Bul jumysqa 8 524 volonter at salysýda.

Aıta keteıik, Aqtóbeniń sý qoımalarynda sý deńgeıi túsip keledi. Óńirdegi sý tasqyny jaǵdaıy turaqty deńgeıde.