Aqtóbede sý tasqyny kezinde kómek kórsetken ustazdar marapattaldy
AQTÓBE. KAZINFORM - Aqtóbede kóktemgi sý tasqyny kezinde evakýatsııalyq pýnktterde jumys istep, kómek kórsetken pedagog mamandar marapattaldy. Sonymen birge aýyl balalaryn qalaǵa aldyryp, bilim bergen ujym 1 mln teńge aldy.
Aqtóbe oblystyq bilim basqarmasynyń basshysy Jaıyq Sultan tótenshe jaǵdaıdyń áserin, sol kezdegi muǵalimderdiń birligin atap ótti. Kóp jylǵy adal eńbegi men bilim salasyn damytýǵa qosqan úlesi úshin alǵys bildirdi.
- Oblysymyzda birneshe aýdan sý tasqynynan zardap shegip, birneshe bilim nysany zaqymdanǵan bolatyn. Onyń ishinde balabaqshalar, mektepter, kolledjder, qosymsha bilim uıymdary bar. Mine, osyndaı kezde «bir jaǵadan bas, bir jeńnen qol shyǵaryp», ujymdyq rýhpen bir úıdiń balasyndaı bolyp jumylyp, abyroımen shyqtyq dep aıtsaq artyq emes. Oblysymyzda birneshe mektep evakýatsııalyq pýnkt retinde qyzmet etti. Úısiz-kúısiz qalǵan jerlesterimizdi ornalastyryp, tamaqtandyryp, olarǵa qajetti jaraqtarmen qamtamasyz etti. Barlyq ustazdarymyz, áriptesterimiz jany ashyp júgirip júrdi. Birde-bir ustaz «bul pedagog statýsyna sáıkes kelmeıtin tapsyrma» dep aıtqan joq. Aýyzbirshiligimiz dál osyndaı myqty bolsyn, - dedi Jaıyq Sultan.
Oqý jylynyń qorytyndysynda QR Oqý-aǵartý mınıstriniń atynan «Y.Altynsarın» tósbelgisi 14 sheber pedagogke tabystady. «Úzdik olımpıadalyq mektep» qataryna engen 4 mektep jáne sý tasqynynan zardap shekken Sh.Bersıev atyndaǵy mektep túlekterin UBT men qorytyndy attestatsııalaýǵa daıyndalýǵa kómegin bergen M.Qusaıynov atyndaǵy daryndy balalarǵa arnalǵan mektep-ınternatynyń muǵalimderi de marapattan qur qalmady. Sharaǵa «Qazaqstandyq salalyq bilim jáne ǵylym qyzmetkerleri kásipodaǵy qoǵamdyq birlestigi» Aqtóbe oblysy uıymynyń tóraıymy Raýshan Serikqyzy Serikova qatysyp, M.Qusaıynov atyndaǵy Aqtóbe oblystyq daryndy balalarǵa arnalǵan mamandandyrylǵan mektep-ınternatynyń kásipodaq múshelerine 1 000 000 teńge berdi. Dırektory Tólegen Aımuqatov «Áleýmettik áriptestikti damytýǵa qosqan úlesi úshin» tósbelgisimen marapattaldy. Úzdik ustazǵa shıpajaıyna joldama tabystaldy.
Aqtóbe oblysy ákiminiń baspasóz qyzmetiniń habarlaýynsha, 2020 jyldan beri «Aqtóbe oblysynyń qurmetti ustazy» jáne «Aqtóbe oblysynyń úzdik pedagogi» ataqtary berilip keledi.
Bul ataqtarǵa ıe bolǵan pedagogterge 300 jáne 500 AEK kólemindegi qarjylaı syıaqy da taǵaıyndalǵan. Búgingi kúnge deıin 28 pedagog osy marapatty ıelendi. Eki pedagog «Qazaqstannyń eńbek sińirgen ustazy» qurmetti ataǵyn aldy.
