Aqtóbede sý tasqyny kezinde baspanasyz qalǵan adamdardyń alǵashqy legi úı satyp aldy
AQTÓBE. KAZINFORM – Aqtóbe oblysy Áıteke bı aýdanynda 5 otbasy úıli boldy. Kóktemdegi sý tasqyny kezinde olardyń baspanasy jaramsyz kúıge túsken bolatyn.
Barlyǵy 5 úıdiń tórteýi Temirbek Júrgenov, al bireýi Áıke aýylynan satyp alyndy. Úı satyp alýǵa qarjy Bolat Ótemuratov qorynan bólindi.
- Áıteke bı aýdanynyń ákimdiginde turǵyn úı satyp alý týraly kelisimshartqa qol qoıyldy. Qujatqa qordyń ókilderi, Áıteke bı aýdanynyń ákimi, sondaı-aq turǵyn úı satýshysy jáne bolashaq ıesi qol qoıdy. Zardap shekken turǵyndar baspanalardy ózderi tańdady. Olardyń talap-tilegi úıdiń qurylysyn kútpesten, daıyn baspana satyp alý edi. 4 otbasyǵa aýdan ortalyǵynda, 1 otbasyǵa Áıke aýylynda úı satyp alyndy, - dep habarlady Aqtóbe oblysy ákiminiń baspasóz qyzmeti.
Aıta keteıik, bul aýdanda Şerbakov bógeti buzylyp, turǵyn úılerge qaýip tóndirdi. Áıteke bı aýdanynyń materıaldyq zalaldy baǵalaý jáne óteý jónindegi komıssııasyna 133 ótinish kelip túsip, 46 turǵynnyń úıi apatty dep tanyldy. Áıteke bı aýdanynyń ákimi Dáýletııar Toǵyzbaevtyń aıtýynsha, kelesi aptada taǵy 15 otbasyǵa úı satyp alynady.
«Keshe úıimizden aıyrylyp, qalaı bolaryn jáne ne kútetinimizdi bilmedik. Mine, bizde jańa úı bar, qalypty ómirimizge oralyp jatyrmyz. Biz úıimizdi ózimiz tańdadyq», - deıdi Áıteke bı aýdanynyń turǵyny Lázzat Jubatova.
Aqtóbe oblysy ákiminiń baspasóz qyzmetiniń habarlaýynsha, Bolat Ótemuratov qory kóktemgi sý tasqynynan zardap shekken Aqtóbe oblysynyń turǵyndaryna 10 mıllıard teńge qarjy bóldi.
