Aqtóbede sý basqan aýdandardyń balalary qalada demalady
AQTÓBE. KAZINFORM – Aqtóbe oblysynda 1-10 synyp oqýshylarynyń jazǵy demalysyn uıymdastyrý josparlanyp otyr. Sý tasqyny kezinde zardap shekken aýyldyń balalary qaladaǵy mektep-ınternatqa ornalastyrylyp, túrli tanymdyq-sporttyq shara uıymdastyrylady.
Aqtóbe oblysy boıynsha 1-10 synyptyń 159 myńnan astam oqýshysy bıyl túgel jazǵy demalyspen qamtylýy múmkin. Aqtóbe oblystyq bilim basqarmasy ár oqýshynyń qala syrtyndaǵy, mektep janyndaǵy, qosymsha bilim berý uıymdary men ózge aımaqtardaǵy demalys oryndaryna baryp, 10-15 kúnin ótkizýdi, sóıtip balalardyń bos ýaqytyn tıimdi uıymdastyrýdy josparlap otyr.
- Aqtóbede 2 memlekettik lager bar. Onyń biri jyl boıy jumys isteıtin – «Kúnshýaq» lageri. Munda 600-den astam bala barady. «Kúnshýaq» lageri erekshe kútimdi qajet etetin jáne arnaıy sanattaǵy balalardyń demalysyn uıymdastyrýǵa ashylǵan bolatyn. Bir aýysymda 100 balany qamtıdy. Aýysym uzaqtyǵy - 10 kún. Ekinshisi Qobda aýdanyndaǵy «Álııa» maýsymdyq lageri. Syıymdylyǵy - 72 bala. 4 aýysymda 300-ge jýyq balany qamtýdy josparlap otyrmyz. Qala syrtyndaǵy ózge de jeke lagerlerde 10 myńǵa jýyq balanyń demalysy uıymdastyrylady. Joldama quny 70-110 myń teńge aralyǵynda, - dedi Aqtóbe oblystyq bilim basqarmasy basshysynyń orynbasary Nurgúl Bertileýova.
Bıyl «Qazaqstan halqyna» qoǵamdyq qory esebinen aýyldyń 1147 balasyna tegin demalys uıymdastyrylady. Іrikteýde úzdik, daryndy, zııatker, shyǵarmashyl balalarǵa basymdyq beriledi. Sonymen birge 7 myńnan astam bala basqa da saýyqtyrý oryndaryna, kórshiles óńirlerdiń lagerlerine jiberiledi.
- Bıyl mektep janyndaǵy 673 lager de jumys isteıdi. Onyń 293-inde tamaq bolady. Al ózgesi beıindi lager. Onda 77 myń bala qamtylady. Lagerler negizinen mádenı, rýhanı, ekologııalyq, tehnologııalyq, ınnovatsııalyq, kórkemdik-estetıkalyq, dene shynyqtyrý, týrıstik-ólkentaný baǵytyn qamtıdy. Respýblıka jáne oblystyń kıeli oryndaryna 26 myńǵa jýyq bala barady dep josparlanǵan. 1 maýsym jáne 31 shilde aralyǵynda oblystaǵy 49 qosymsha bilim berý mekemesi de jumysyn jalǵastyrady. Jazǵy alań men úıirmeler bolady, - dedi Nurgúl Bertileýova.
Al 700-ge jýyq oqýshy jaz aılarynda jumys isteı alady. Zań aıasynda olar jeńil jumysqa tartylady. «Jasyl el» jasaǵyna 558 oqýshy, Oıyl aýdanynyń «Sparta» sharýashylyǵynda 45, ata-analarymen 70 adam barady. Al sý tasqyny saldarynan zardap shekken birneshe aýdandaǵy aýyl balalaryna «Talant týr» jobasy uıymdastyrylady.
- Joba aıasynda 500 bala qamtylady. Olardyń demalysy jergilikti bıýdjet esebinen qarjylandyrylady. Olar qaladaǵy mektep-ınternattarǵa ornalastyrylyp, kórikti jerlerge, murajaılarǵa aparylady. Mádenıet, tarıh, ólketaný, sport, zııatker, bilim-lıngvıstıka baǵytynda sheberlik klastar, ınteraktıvti ekskýrsııalardy uıymdastyrý josparlanyp otyr. «Jandy sabaqtar» jobasy aıasynda 2500 bala kólikti, kıeli jerlerdi aralaıdy. Qala syrtyndaǵy, mektep janyndaǵy demalysty uıymdastyrý úshin shtab quryldy. Quramynda bilim basqarmasynyń mamandary, epıdemıolog mamandar men polıtsııa, tótenshe jaǵdaılar qyzmetkerleri kirip otyr. Qaýipsizdik, tamaqtaný oryndarynyń sanıtarlyq tazalyǵy nazarda bolady, - dedi Aqtóbe oblystyq bilim basqarmasy basshysynyń orynbasary Nurgúl Bertileýova.
