Aqtóbede sot otyrysyna qatysýshylar daý týdyrǵan kópqabatty ǵımaratty aralady
AQTÓBE. KAZINFORM – Muǵaljar aýdany Qandyaǵash qalasyndaǵy bes qabatty ǵımarat ishine tek qylmystyq iske qatysy bar taraptar kirdi. Sottalýshylar bolsa ózine taǵylǵan aıyppen kelispedi.
№ 2 Aqtóbe qalalyq sotynda Muǵaljar aýdandyq máslıhatynyń tóraǵasy, depýtaty jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshyǵa qatysty is qaralyp jatyr. Sottalýshylardyń úsheýi de ózine taǵylǵan aıyppen kelispedi. Muǵaljar aýdandyq máslıhatynyń tóraǵasy bes qabatty ǵımaratty 2020 jyly 8 mln teńgege satyp alǵan. Keıin oǵan jóndeý jumystaryn júrgizip, satýdy josparlaıdy. Ol úshin burynǵy jataqhana ǵımaratynyń tehnıkalyq tólqujatyn turǵyn úı dep ózgertip, ınjenerlik jelilerdi tartady. Dál sol shaqta sottalýshylardyń biri, depýtat satýǵa kómektesý týraly usynys beredi.
- Alǵashqy kezde qur qańqasy turdy. Keıin men jertólesinen bastap barlyǵyn jóndedim. Gazdy qosyp, turǵyndardy kirgizýge daıyndaldy. Jóndeý jumystaryna otbasylyq qarjyny saldym, keıbirin tanystarymnan qaryzǵa aldym. Men alǵanda jataqhana, keıin ol kópqabatty úıge aınaldy. Oǵan qajetti barlyq qujat tapsyryldy. Keıin úıdi áıeline syıǵa berdim. Ol satý jumystaryn uıymdastyrdy. Maǵan satýǵa kómektesý usynysyn aıtqan adammen de áıelim kelisti, - dedi sottalýshy.
Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy da sotta taǵylǵan aıyppen kelispedi. Ol jumystyń bári aýdan ákimi Darhan Ermaǵambetovpen aradaǵy kelisim aıasynda atqarylǵanyn aıtty.
- Respýblıkalyq bıýdjetten alǵashynda 105 600 000 teńge aqsha bólindi. Aqsha 11 páter alýǵa berildi. Sol kezde konkýrs jarııalanǵanymen eshqandaı da usynys túspedi. Keıin aýdan ákimi Darhan Ermaǵambetov taǵy 59 páterge aqsha bólinetin aıtty. Men qujattaryn jasadym. Alaıda tehnıkalyq negizdeme unamaı, ákim daıyn qujatty úlgi retinde kórsetti. Sol tehnıkalyq negizdeme aıasynda biz 2023 jyldyń qyrkúıek aıynda konkýrs jarııaladyq. Konkýrsqa bir ǵana adam qatysty. Biz qujattaryn tekserdik, bári talapqa saı boldy. Barlyq jerge turǵan úı, páter dep kórsetilgen. Eger qarjy ıgerilmese, respýblıka aqshany keri alyp, biz jazalanatyn edik. Barlyq qarjy bólindi, - dedi Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy.
Qarjy túgel aýdarylǵanymen, qysta boran kezinde shatyry ushyp, qubyr jarylǵan, páter ishin sý basqan. Úıdi tapsyrý taǵy eki aıǵa keıingi shegerilgenimen, tekserý bastaldy.
- Meniń aram oıym bolmady, jeke paıda tappadym. Basshynyń qyzmetin ýaqytsha atqardym,- dedi sottalýshy.
Sot oqıǵa ornyn qaraý týraly qaýly shyǵaryp, is qatysýshylary Muǵaljar aýdany, Qandyaǵash qalasyna bardy. Kóshpeli sot otyrysy kezinde kópqabatty ǵımarat ishin aralap, qarap shyqty.Qazirgi kezde birinshi qabattaǵy terezeleri synyp, ony qańyltyrmen qaptaǵan. Sonymen birge birneshe qabatta áınek synyp tur.
Eske salsaq, Muǵaljar aýdandyq máslıhatynyń tóraǵasy, depýtaty jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshyǵa «Alaıaqtyq», «Qylmystyq jolmen alynǵan aqshany jáne ózge de múlikti zańdastyrý», «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baptary boıynsha aıyp taǵylyp jatyr.