Aqtóbede soqtyǵysyp qalǵan eki kólik túgi qalmaı órtenip ketti
AQTÓBE. KAZINFORM – Jol-kólik apaty Samara-Shymkent tasjolynyń Aqjar aýyly mańynda boldy. Kólik apaty kezinde bir júrgizýshi kóz jumdy.
Oqıǵa búgin saǵat 09:00 shamasynda tirkeldi. Samara-Shymkent avtojolynyń Aqjar aýylynyń mańynda GAZel avtokóligi men Toyota Alhpard mınıveni soqtyǵysty. Saldarynan mınıven júrgizýshisi oqıǵa ornynda qaza tapty.
- Toyota Alhpard mınıveniniń jolaýshylary Hromtaý aýdanynyń aýrýhanasyna jetkizildi. Jol-kólik oqıǵasy faktisi boıynsha sotqa deıingi tergep-tekserý bastaldy. Tıisti saraptamalar taǵaıyndaldy, - dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.
Aıta keteıik, sońǵy kezderi óńirde jol-kólik apaty kezinde kóliktiń janý deregi jıi tirkele bastady. Buǵan deıin Aqtóbe-Atyraý tasjolynda 8 adam kólik ishinen shyǵa almaı, janyp ketken bolatyn.
