Aqtóbede para alǵan mektep dırektory sottaldy
AQTÓBE. KAZINFORM – Mektep dırektory 250 myń teńge para alǵan. Oǵan 7,5 mln teńge aıyppul salyndy.
№2 Aqtóbe qalalyq sotynda Mirjaqyp Dýlatuly atyndaǵy №63 mektep-lıtseıiniń dırektory Alıma Aızaqovaǵa qatysty qylmystyq is qaraldy. Oǵan Qylmystyq kodekstiń «Para alý» baby boıynsha aıyp taǵyldy.
Іs materıalyna súıensek, byltyr jazda ǵana basshylyq qyzmetke taǵaıyndalǵan A.Aızaqova ınternet júıesin jóndeý týraly konkýrs jarııalaıdy. Konkýrsqa «Amanov» JK qatysady. Joba quny bar bolǵany - 339 876 teńge. Eki tarap kelisimshartqa qol qoıyp, ınteraktıvti taqtany jóndeý, Ulttyq kýálandyrýshy ortalyqtyń sertıfıkatyn qondyrý sekildi jumystardy mindetteıdi. Erli-zaıypty jeke kásipker jumysty atqarady.
Alaıda keıbir jumys tehnıkalyq talapqa saı bolmaı shyǵady. Sol kezde mektep dırektory kásipkerdi josyqsyz dep tanýǵa bolatynyn bilip, qabyldaý aktisine qol qoıýdan bas tartady.
Jumysty kedergisiz qabyldaý úshin kásipkermen jeke kezdesip, 300 000 teńge para suraıdy. Keıin jeke kásipker somany 250 000 teńgege deıin túsirýdi surady. Dál osy tusta jeke kásipker ózine artylǵan jumysty tolyq oryndap, ınteraktıvti taqtany da iske qosady. Soǵan qaramastan dırektor qabyldaý aktisine qol qoımaıdy.
Sot kabınetindegi is materıalyna súıersek, jeke kásipker keıin UQK Aqtóbe oblystyq departamentine baryp, mán-jaıdy habarlaıdy. Sol kezde jeke kásipkerge arnaıy belgisi bar 230 000 teńge beriledi, ózi 20 myń teńge qosyp, kelisim boıynsha aqshany mekteptegi dırektordyń óz kabınetinde beredi.
Sot otyrysynda sottalýshy ózine taǵylǵan aıypty tolyq moıyndady, isine ókindi. Sot úkimimen mektep dırektory Alıma Aızaqova kináli dep tanylyp, paranyń 30 eselengen túrinde aıyppul salyndy.
ıAǵnı sottalýshy 250 myń teńgeni 7,5 mln teńge etip qaıtarady jáne memlekettik, jergilikti ózin-ózi basqarý qyzmetinde jumys isteý quqyǵynan ómir boıyna aıyryldy.
Sot úkimi zańdy kúnine engen joq.
Aıta keteıik, Aqtóbe oblysynyń bilim salasynda sapany qamtamasyz etý departamenti bóliminiń basshysy para alǵany, al eki mekteptiń dırektory oǵan para bergeni úshin jazalandy.