Aqtóbede oqýshylarǵa mantý ornyna BTsJ salǵan medbıke isin prokýratýra tekserip jatyr
Aqtóbe qalasyndaǵy №74 orta mektep ata-analary alańdaýly. Barlyǵy 61 oqýshynyń 11-i mantý synamasyn alýǵa qarsy bolsa, 8-ine dáriger medıtsınalyq turǵyda vaktsına saldyrýdy shegerýge sheshim shyǵarǵan.
Ózge 42 oqýshyǵa mantý synamasynyń ornyna BTsJ vaktsınasy berilip, eki aptada balalardyń bilegi irińdi jaraǵa aınaldy.
«Oqıǵa 13 qyrkúıek kúni bolǵan. Osy aýmaqqa qyzmet kórsetetin «Medıkýs» jeke medıtsınalyq ortalyǵynyń qyzmetkerleri mektepke baryp, ata-analar kelisimimen mantý berýi tıis edi. Biraq mantý ortyna BTsJ saldy. Bylaı qaraǵanda biri suıyqtyq, ekinshisi untaq. Qatelik meıirbıkeden ketip tur. Osy oqıǵadan soń eki komıssııa quryldy. Birinshisi, densaýlyq saqtaý basqarmasynda. Onda sanıtarııalyq-epıdemıologııalyq baqylaý departamenti, ınfektsıonıst, ımmýnolog, allergolog mamandar bar. Ekinshiden, oblystyq bilim basqarmasy shaǵym túsirdi. Muny medıtsınalyq sapany baqylaýshylar tekseredi. Olardyń qatarynda táýelsiz sarapshylar, ata-analar bar. Sonymen birge prokýratýra is qozǵap, jumys júrgizip jatyr»,- dedi oblystyq densaýlyq saqtaý basqarmasynyń basshysy Rústem Isaev.
Aıta keteıik, BTsJ berilmes buryn balaǵa mantý sanamasy salynady. Bul - aǵzanyń daıyndyǵyn tekserýge arnalǵan shara.
Eger mantý isip ketse, medıtsınalyq turǵydan BTsJ berý keıinge shegeriledi.
«Qatelik ketkenin moıyndaımyz. Ata-analarǵa túsindirý jumysy júrgizildi. Biraq qorqýǵa esh negizgi joq. BTsJ denege engen soń áserin berip, jara boldy. Bul jaqsy. Demek antıdene qalyptasyp jatyr. Ony shuqyp, tańyp, maz jaǵýdyń qajeti joq. Bári bir aıdyń ishinde jazylady. Qyzýy kóterildi, ishi aýyrdy dep ata-analar habarlasty. Bári qalpyna keledi», - dedi Rústem Isaev.
Aqparatqa súıensek, «Medıkýs» medıtsına ortalyǵy 1999 jyldan beri jumys istep tur. Aqtóbe qalasyndaǵy birneshe aýmaqqa medıtsınalyq qyzmet kórsetedi. Bıyl bul ortalyqqa 600 mln teńge aqsha bólingen. Tekseris aıaqtalmaı, kelisimshartty buzý týraly sheshim qabyldanbaıdy.
«Qazirgi kezde «Medıkýs» ortalyǵyna tekserý bastaldy. Barlyq materıal quqyq qorǵaý organdaryna jiberiledi. Aıta keterligi, moratorııge baılanysty sońǵy kezderi bul medıtsınalyq mekeme tekserilmedi», - dedi Aqtóbe oblysy sanıtarlyq-epıdemıologııalyq baqylaý departamentiniń basshysy Raıhan Qoıshanova.
Túsindirme jumysyna arnaıy mamandar da qatysyp, BTsJ-nyń áseri týraly aıtyp berdi.
«BTsJ mindetti vaktsınaǵa jatady. Bul bizdiń balalarymyzdy qorǵaýǵa arnalǵan. Týberkýlez qazir aýyr ótedi. Tehnıkalyq qatelik ketkenin moıyndaımyz. BTsJ mantýdan keıin berilýi kerek edi. Biraq báribir bala BTsJ alýy kerek. Reaktsııa bolǵany jaqsy. Antıdene qalyptasyp jatyr», - dedi oblystyń shtattan tys allergologi Zámza Haırýllına.
Al oblystyq ftızıopýlmonologııalyq ortalyqtyń bas dárigeri Erlan Tátimovtiń aıtýynsha, jaǵdaı elimizdiń ǵylymı zertteý ortalyǵyna habarlandy.
Ǵylymı zertteý ınstıtýtynan bas ftızıator kelip, táýelsiz tekserý júrgizedi.
«BTsJ keıbir allergııa týdyrýy múmkin. Basqa keri zııany joq. Aýrý qozdyrmaıdy», - dedi Erlan Tatımov.
Oblystyń bas dárigeri Rústem Isaev osy oqıǵadan soń vaktsınaǵa qarsylyq kúsheıýi múmkin dep qaýiptenip otyr. Sondyqtan mektepterde túsindirý jumystary jalǵasady.
«Bárinen keshirim suraımyz. Grıpp, JRVI, koronavırýsqa qarsy vaktsına saldyrý kerek bolǵan kezde bul keri áserin tıgizýi múmkin. Biraq vaktsına bizdi túrli vırýstan saqtaıdy», - dedi R.Isaev.
